மொன்றியலில் உள்ள வரலாற்றுச் சிறப்புமிக்க ஒலிம்பிக் மைதானத்தின் உட்புறப் புனரமைப்புப் பணிகளுக்குத் தேவையான முழுமையான நிதியுதவிகளை வழங்கி, அதன் கட்டுமாணப் பணிகளை விரைந்து நிறைவு செய்யுமாறு கியூபெக் மாகாண அரசியல்வாதிகளுக்கு கோரிக்கை முன்வைக்கப்பட்டுள்ளது. மேஜர் லீக் சாக்கர் (MLS) அமைப்பின் ஆணையாளர் டான் கார்பர் (Don Garber) இந்த அவசரக் கோரிக்கையை விடுத்துள்ளார்.
2027-ஆம் ஆண்டு முதல் எம்.எல்.எஸ் (MLS) கால்பந்து தொடரானது குளிர்கால அட்டவணைக்கு (Winter Calendar) மாறத் தயாராகி வரும் நிலையில், மொன்றியல் அணியின் நீண்டகால நிலைத்தன்மைக்கு இந்த மைதானத்தின் நவீனமயமாக்கல் இன்றியமையாதது என அவர் வலியுறுத்தியுள்ளார். மொன்றியலுக்கு உத்தியோகபூர்வ விஜயமொன்றை மேற்கொண்டிருந்த எம்.எல்.எஸ் ஆணையாளர் டான் கார்பர், தற்போது ஒலிம்பிக் மைதானத்தில்
நடைபெற்று வரும் கூரை மாற்றும் பணிகளை நேரில் பார்வையிட்டார்.
இதனைத் தொடர்ந்து நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவித்த டான் கார்பர், மாகாண அரசு தற்போது மேற்கொண்டு வரும் பணிகள் பாராட்டுக்குரியவை எனினும், கூரையை மாற்றுவதுடன் மட்டும் நிறுத்திக் கொள்ளாமல் மைதானத்தின் உட்புறத்தை முழுமையாக மாற்றியமைக்க வேண்டும் எனக் கேட்டுக்கொண்டார்.
மைதானத்தின் உட்புறத்தை சர்வதேசத் தரத்திற்கு நவீனமயமாக்குவதற்கு 500 மில்லியன் டொலர் நிதி தேவைப்படும் என மதிப்பிடப்பட்டுள்ள நிலையில், மாகாண அரசு அல்லது அரசியல் தலைவர்கள் எவரும் இதுவரை இந்த மேலதிக நிதி ஒதுக்கீட்டிற்கு உத்தியோகபூர்வமாக ஒப்புதல் அளிக்கவில்லை என்பது குறிப்பிடத்தக்கது.
தற்போது மொன்றியலின் உள்ளூர் கால்பந்து அணியான சி.எஃப் மொன்றியல் (CF Montréal) தனது சொந்தப் போட்டிகளை ஸ்டேட் சபுட்டோ (Stade Saputo) மைதானத்திலேயே விளையாடி வருகின்றமை சுட்டிக்காட்டத்தக்கது.
