சந்திரனைச் சுற்றி வந்து வரலாற்றுச் சாதனை படைத்துள்ள ‘ஆர்டெமிஸ் II’ (Artemis II) விண்கலத்தின் வீரர்களுடன் பிரதமர் மார்க் கார்னி நேற்று காணொளி வாயிலாக உரையாடினார்.
இந்த விண்வெளிப் பயணத்தில் கனேடிய விண்வெளி வீரர் ஜெரமி ஹேன்சன் (Jeremy Hansen) ஆற்றிய பங்களிப்பைப் பாராட்டிய பிரதமர், அவருடன் உணவு குறித்து நகைச்சுவையாக உரையாடியமை இணையத்தில் பரவலாகப் பகிரப்பட்டு வருகிறது.
அமெரிக்காவின் நாசா (NASA) மற்றும் கனேடிய விண்வெளி ஆய்வு நிறுவனம் இணைந்து முன்னெடுத்த இந்தத் திட்டத்தின் மூலம், நிலவுக்கு மிக அருகில் சென்ற முதல் அமெரிக்கர் அல்லாத வீரர் என்ற பெருமையை ஜெரமி ஹேன்சன் பெற்றுள்ளார்.
கடந்த திங்கட்கிழமை பூமியிலிருந்து சுமார் 4 இலட்சம் கிலோமீட்டர் தொலைவை எட்டியதன் மூலம், 1970-ஆம் ஆண்டில் அப்போலோ 13 படைத்த சாதனையை, இந்த ‘ஆர்டெமிஸ் II’ விண்கலத்தின் வீரர்கள் முறியடித்துள்ளனர்.
கடந்த ஏப்ரல் 1-ஆம் திகதி விண்ணில் பாய்ந்த இந்த ‘ஆர்டெமிஸ் II’ விண்கலம், தனது 10 நாள் பயணத்தை முடித்துக் கொண்டு எதிர்வரும் வெள்ளிக்கிழமை பசிபிக் கடலில் வந்து இறங்கவுள்ளது.
இந்த நிலையில், கனேடிய விண்வெளி வீரர் ஜெரமி ஹேன்சனுடன் உரையாடிய பிரதமர் மார்க் கார்னி “உங்கள் சாதனையை எண்ணி கனடா பெருமை கொள்கிறது” எனத் தெரிவித்ததுடன், விண்வெளியில் பிரெஞ்சு மொழி ஒலிப்பதைக் கேட்பது மகிழ்ச்சி அளிப்பதாகவும் குறிப்பிட்டார்.
