கியூபெக் மாகாண அரசின் சர்ச்சைக்குரிய மொழிச் சட்டம் (Bill 96) மற்றும் மத அடையாளத் தடைச் சட்டம் (Bill 21) ஆகியவற்றுக்கு எதிராக நீதிமன்றத்தில் போராடுவதற்காக, ஆங்கில மொன்றியல் பாடசாலைச் சபை (EMSB) இதுவரை 1.67 மில்லியன் டொலர்களுக்கும் அதிகமான நிதியைச் செலவிட்டுள்ளது.
அந்த பாடசாலைச் சபை வெளியிட்டுள்ள நிதி அறிக்கையின்படி, இரண்டு முக்கிய சட்டங்களுக்கு எதிராக இந்த நிதி செலவிடப்பட்டுள்ளது. ஆசிரியர்கள் உள்ளிட்ட அரசு ஊழியர்கள் பணியிடங்களில் மத அடையாளங்களை அணியத் தடை விதிக்கும் இந்த Bill 21 சட்டத்தை எதிர்த்துப் போராட 1.1 மில்லியன் டொலர் செலவிடப்பட்டுள்ளது.
பிரெஞ்சு மொழியை முதன்மைப்படுத்தும் நோக்கில் கொண்டுவரப்பட்ட புதிய மொழிச் சட்டமான Bill 96 க்கு எதிராக போராட இதுவரை 5,70,000 டொலர் செலவாகியுள்ளது.
இந்தச் சட்டங்கள் எமது சமூகத்தின் அடிப்படை உரிமைகளைப் பறிக்கின்றன என்று ஆங்கில மொன்றியல் பாடசாலைச் சபையின் தலைவர் ஜோ ஒர்டோனா (Joe Ortona) தெரிவித்துள்ளார்.
தகுதியான ஆசிரியர்களைப் பணியமர்த்துவதற்கும், மாணவர்களுக்குச் சரியான முறையில் சேவையாற்றுவதற்கும் இந்தச் சட்டங்கள் தடையாக இருப்பதாகவும், அதனாலேயே இந்தச் சட்டப் போராட்டத்தை முன்னெடுப்பதாகவும் அவர் குறிப்பிட்டுள்ளார். இதேவேளை, கல்விக்காகப் பயன்படுத்தப்பட வேண்டிய பொதுமக்களின் வரிப்பணம், கியூபெக் மாகாண அரசுக்கு எதிரான நீண்டகால நீதிமன்ற வழக்குகளுக்குச் செலவிடப்படுவது குறித்து ஒரு தரப்பினர் கடும் விமர்சனங்களை முன்வைத்துள்ளனர். இந்த வழக்குகள் தற்போது கியூபெக் நீதிமன்றங்களில் நிலுவையில் உள்ள நிலையில், இவை அடுத்ததாகக் கனடிய உச்ச நீதிமன்றத்திற்குச் செல்லும் என எதிர்பார்க்கப்படுகிறது.
