நுனாவுட் (Nunavut) தொகுதி நாடாளுமன்ற உறுப்பினர் லோரி இட்லவுட், புதிய ஜனநாயகக் கட்சியிலிருந்து (NDP) விலகி ஆளும் லிபரல் கட்சியில் இணைந்துள்ளார்.
இன்று காலை பிரதமர் மார்க் கார்னியுடன் இணைந்து இந்த அதிரடி முடிவை அவர் அறிவித்தார்.
ஆர்க்டிக் பிராந்தியத்தின் வளர்ச்சிக்குத் தேவையான நிதியைப் பெற ஆளும் கட்சியுடன் இணைவதே சரியான வழி என்று அவர் விளக்கம் அளித்துள்ளார்.
கடந்த 2021 முதல் நுனாவுட் மக்களின் பிரதிநிதியாக இருக்கும் இட்லவுட், தனது மக்களின் அடிப்படைத் தேவைகளான வீட்டு வசதி, உணவுப் பாதுகாப்பு மற்றும் சுகாதாரக் கட்டமைப்புகளை மேம்படுத்தவே இந்த முடிவை எடுத்ததாகத் தெரிவித்தார்.
“தனது தொகுதி மக்களின் கோரிக்கைகளை நிறைவேற்ற வேண்டுமானால், பட்ஜெட் தயாரிக்கப்படும் இடத்திலும், முடிவுகள் எடுக்கப்படும் அதிகார மையத்திலும் நான் இருக்க வேண்டியது அவசியம்” என்று அவர் குறிப்பிட்டார்.
பிரதமர் மார்க் கார்னி தலைமையிலான லிபரல் அரசுக்கு இட்லவுட்டின் வருகை நாடாளுமன்றத்தில் பெரும் பலத்தைச் சேர்த்துள்ளது.
இதன் மூலம் நாடாளுமன்றத்தில் லிபரல் கட்சி பெரும்பான்மையை நோக்கிய தனது பயணத்தில் ஒரு படி முன்னேறியுள்ளது.
இட்லவுட்டின் வரவை வரவேற்ற பிரதமர், “ஆர்க்டிக் பிராந்தியத்தின் இறையாண்மை மற்றும் பழங்குடியின மக்களின் உரிமைகளுக்காக இட்லவுட் ஆற்றிவரும் பணி, தமது மத்திய அரசுக்கு மிகவும் உதவியாக இருக்கும்” எனத் தெரிவித்தார்.
