கனடாவில் கடவுசீட்டு பெறும் கட்டணம் விரைவில் உயரவுள்ளது. பிரதமர் மார்க் கார்னி தலைமையிலான அரசின் புதிய திட்டங்களின்படி, எதிர்காலத்தில் கடவுசீட்டு கட்டணங்கள் மேலும் அதிகரிக்கக்கூடும் என தெரிவிக்கப்பட்டுள்ளது.
ஜனவரி மாத இறுதியில் நிறைவேற்றப்பட்ட Order-in-Council தீர்மானத்தின் அடிப்படையில், இனிமேல் கடவுசீட்டு கட்டணங்கள் நுகர்வோர் விலை குறியீட்டுடன் (Consumer Price Index – CPI) இணைக்கப்படவுள்ளதாக தெரிவிக்கப்பட்டது.
இதன்படி, மார்ச் 31 முதல் கனடிய கடவுசீட்டு கட்டணம் 2.7% அதிகரிக்கிறது. இது 2024 ஏப்ரல் மாத CPI உயர்வை அடிப்படையாகக் கொண்டதாகும். மேலும் கனடாவிற்குள் விண்ணப்பிக்கும் 5 ஆண்டு கடவுசீட்டு கட்டணம் → 123.24 டொலராகவும்
கனடாவிற்கு வெளியே விண்ணப்பிக்கும் 10 ஆண்டு கடவுசீட்டு கட்டணம் → $267.02 டொலராகவும் இருக்குமெனவும் இது ஆரம்ப கட்ட உயர்வு மட்டுமே என Immigration, Refugees and Citizenship Canada (IRCC) தெரிவித்துள்ளது.
இதேவேளை அமைச்சகம் வெளியிட்ட விளக்க அறிக்கையில்:
தற்போதைய அடிப்படை கட்டண அமைப்பு மட்டும் பாஸ்போர்ட் திட்டத்தின் செயல்பாட்டு செலவுகளை சமாளிக்க முடியவில்லை என கூறப்பட்டுள்ளது.
கடைசியாக கட்டணங்களில் பணவீக்கம் கணக்கில் எடுத்ததிலிருந்து, CPI 14.5% உயர்ந்துள்ளது. இதனால் 2024–25 நிதியாண்டில் செலவுகள் வருமானத்தை விட சுமார் $121 மில்லியன் அதிகமாகியுள்ளதாக தெரிவிக்கப்பட்டுள்ளது.
தற்போது பாஸ்போர்ட் கட்டண அமைப்பு முழுமையாக மறுபரிசீலனை செய்யப்பட்டு வருகிறது. உண்மையான செயல்பாட்டு செலவுகளை பிரதிபலிக்கும் வகையில் எதிர்காலத்தில் மேலும் கட்டண மாற்றங்கள் அறிவிக்கப்படலாம் என அதிகாரிகள் தெரிவித்துள்ளனர்.
