கருங்கடல் முடக்கம் காரணமாக உக்ரேனியத் தானியங்களை அண்டை நாடுகளான போலந்து, ரோமானியா, ஸ்வாக்கியா மற்றும் ஹங்கேரி வழியாக எடுத்துச் செல்ல அனுமதிக்குமாறு உக்ரைன் அதிபர் விளாடிமிர் ஜெலென்ஸ்கி கோரியுள்ளதாக ஹங்கேரி பிரதமர் பீட்டர் மகியார் தெரிவித்துள்ளார்.
உக்ரைன் – ஹங்கேரி உறவுகளை மீட்டமைப்பது குறித்து வெள்ளிக்கிழமை நடைபெற்ற பேச்சுவார்த்தைகளுக்குப் பிறகு பேசிய மகியார், உக்ரேனியத் தானியங்கள் ஹங்கேரி வழியாக மற்ற இடங்களுக்கு மட்டுமே சென்றால் இந்த நடவடிக்கைக்குத் தனக்கு எந்த எதிர்ப்பும் இல்லை எனத் தனியார் தொலைக்காட்சி நிறுவனமான RTL-க்கு அளித்த பேட்டியில் குறிப்பிட்டுள்ளார்.
கோதுமை, சோளம் மற்றும் சூரியகாந்தி விதை உற்பத்தியில் உக்கிரேன் உலகளவில் முன்னணியில் உள்ளது. அதன் ஏற்றுமதியில் சுமார் 90 சதவீதம் கருங்கடல் வழியாகவே செல்கிறது. அங்கு ரஷ்யாவின் தாக்குதல்கள் காரணமாக வேளாண் ஏற்றுமதிகள் கிட்டத்தட்ட தடைபட்டுள்ளன.
ரஷ்யாவின் பிப்ரவரி 2022 படையெடுப்புக்குப் பிறகு முன்மொழியப்பட்ட தீர்வைப் போன்றே இந்தத் தானியப் போக்குவரத்து இருக்கும் என்று மகியார் கூறினார். போரின் தொடக்கத்தில் மூன்று அல்லது நான்கு ஆண்டுகளுக்கு முன்பு செய்தது போல, தானியப் போக்குவரத்தை அனுமதிக்குமாறு போலந்து, ரோமானியா, ஸ்வாக்கியா, ஹங்கேரி மற்றும் அனைத்து அண்டை நாடுகளையும் ஜெலென்ஸ்கி கேட்டுக் கொண்டதாக அவர் தெரிவித்தார்.
முன்னாள் பிரதமர் விக்டர் ஓர்பானைக் காட்டிலும் கீவ் மீது குறைந்த மோதல் போக்கைக் கடைப்பிடித்துள்ள மகியார், உக்ரேனுக்கு ஆயுதங்களை அனுப்பப்போவதில்லை என்றும், ஹங்கேரிய சிறுபான்மையினரின் உரிமைகள் குறித்து முன்னேற்றம் வேண்டும் என்றும் வலியுறுத்தியுள்ளார்.
உக்ரேனுக்கு எதிரான “மனுஷியமற்ற ரஷ்ய ஆக்கிரமிப்பு” தொடர்பாக ஜெலென்ஸ்கிக்கு தனது முழு ஒற்றுமையையும் அவர் உறுதிப்படுத்தினார்.
சீல் வைக்கப்பட்ட ரயில்களில் சோளத்தை மேற்கு ஐரோப்பாவிற்கு மாற்ற முடிந்தால் அது தங்களுக்குப் பெரிதும் உதவும் என்று ஜெலென்ஸ்கி தன்னுடன் தனியாக நடத்திய சந்திப்பில் குறிப்பிட்டதாக மகியார் தெரிவித்தார். தானியங்கள் நாட்டைக் கடந்து சென்றால் மட்டுமே எந்தத் தடையும் இருக்காது என்று தான் கூறியதாகவும் அவர் கூறினார்.
இதனிடையே, ஆகஸ்ட் மாத இறுதியில் ஐரோப்பிய ஆணையம் வெளியிட்ட கணிப்பின்படி, ஐரோப்பிய ஒன்றியத்தின் இந்த ஆண்டு சோளம் அறுவடை 50.1 மில்லியன் மெட்ரிக் டன்னாக இருக்கும் என எதிர்பார்க்கப்படுகிறது.
இது கடந்த மூன்று ஆண்டுகளின் சராசரியை விட ஐந்தில் ஒரு பங்கு குறைவாகவும், கடந்த இரண்டு தசாப்தங்களில் இல்லாத அளவுக்குக் மிகக் குறைவாகவும் பதிவாகியுள்ளது. சாதனை அளவிலான வெப்பம் மற்றும் வறட்சி காரணமாக பிரான்ஸ் மற்றும் ஹங்கேரி நாட்டு விவசாயிகள் கடுமையாகப் பாதிக்கப்பட்டுள்ளனர்.
