நோவா ஸ்கோடியா மாகாணத்தின் கேப் பிரட்டன் தீவுப் பகுதியில், செயற்கை நுண்ணறிவு (AI) தொழில்நுட்பத்திற்கான பாரிய தரவு மையம் (Data Centre) ஒன்றை அமைப்பதற்கான முதற்கட்டப் பணிகள் தொடங்கப்பட்டுள்ளன.
‘எவர்விண்ட் ஃபியூல்ஸ்’ (EverWind Fuels) நிறுவனத்தால் முன்னெடுக்கப்படும் இத்திட்டத்திற்காகப் பிரைவேட் மூலதனம் மூலம் 8 பில்லியன் டொலர் திரட்டப்படவுள்ளதுடன், இதனுடன் இணைந்த காற்றாலை மின் திட்டங்களுக்காக மேலும் 2 பில்லியன் டொலர் முதலீடு செய்யப்படவுள்ளது.
போர்ட் ஹாக்கேஸ்பரிக்கு அருகில் உள்ள பாயிண்ட் டப்பர் தொழிற்பூங்காவில் அமைக்கப்படவுள்ள இத்தரவு மையமானது இரண்டு கட்டங்களாகச் செயற்படுத்தப்படும் என அறிவிக்கப்பட்டுள்ளது. இதன் முதற்கட்டப் பணிகள் 2027ஆம் ஆண்டின் இறுதிக்குள் செயல்பாட்டுக்கு வரும் என்றும், இரண்டாம் கட்டம் 2028ஆம் ஆண்டில் நிறைவடையும் என்றும் எதிர்பார்க்கப்படுகிறது.
அவுஸ்திரேலிய-அமெரிக்க முதலீட்டு நிபுணர் ட்ரென்ட் விச்சி (Trent Vichie) தலைமையிலான எவர்விண்ட் நிறுவனம், இந்தத் தரவு மையத்தை நிர்மாணித்து இயக்குகிறது. அத்துடன், பெயர் வெளியிடப்படாத முன்னணி செயற்கை நுண்ணறிவு நிறுவனம் ஒன்றுக்கு இதன் முதற்கட்டத்தைக் குறைந்தபட்சம் 20 ஆண்டுகளுக்குக் குத்தகைக்கு விடுவதற்கான உடன்படிக்கையையும் நிறுவனம் செய்துடைத்துள்ளது.
இதற்கான மின் உற்பத்தித் திட்டத்தின் முதற்கட்டத்தின் மூலம் 95 மெகாவாட் மின்சாரமும், இரண்டாம் கட்டத்தின் மூலம் 325 மெகாவாட் மின்சாரமும் உற்பத்தியாகும் என மதிப்பிடப்பட்டுள்ளது. இதன் மூலம் மொத்த மின் உற்பத்தி திறன் 420 மெகாவாட்டாக உயரும் என எதிர்பார்க்கப்படுகின்றது. நோவா ஸ்கோடியா மாகாணத்தின் தற்போதைய ஒட்டுமொத்த மின் உற்பத்தி திறன் சுமார் 3,000 மெகாவாட் என்பது குறிப்பிடத்தக்கது.
மின்சார விநியோகம் மற்றும் சுற்றுச்சூழல் தாக்கங்கள் குறித்துப் பேசியுள்ள நிறுவனத்தின் தலைமை அதிகாரி ட்ரென்ட் விச்சி, மாகாணத்தின் மின் கட்டமைப்பைப் பாதுகாப்பதிலும், உள்ளூர் வாடிக்கையாளர்களின் நலன்களை உறுதிப்படுத்துவதிலும் நிறுவனம் முழுப் பொறுப்புடன் செயற்படும் எனத் தெரிவித்துள்ளார். நோவா ஸ்கோடியா மாகாணத்தின் மின்கட்டமைப்பு இத்திட்டத்தின் முதற்கட்டச் சுமையைத் தாங்கக்கூடியது என மாகாண மின்சாரக் கட்டமைப்பு ஆய்விலும் உறுதிப்படுத்தப்பட்டுள்ளது.
