அமெரிக்கத் தொழிலாளர் துறை வெளியிட்ட தரவுகளின்படி, 2026 செப்டம்பர் மாதத்தில் நுகர்வோர் விலைக் குறியீடு (CPI) முந்தைய ஆண்டின் அதே மாதத்துடன் ஒப்பிடும்போது 3.7 சதவீதம் அதிகரித்துள்ளது. ஆகஸ்ட் மாதத்தில் இந்த அதிகரிப்பு 3.4 சதவீதமாக இருந்தது. மாதாந்திர அடிப்படையில் விலைகள் 0.6 சதவீதம் உயர்ந்துள்ளன.
எரிபொருள் விலை உயர்வு பணவீக்க அதிகரிப்புக்கு முக்கியக் காரணங்களில் ஒன்றாகக் குறிப்பிடப்பட்டுள்ளது. செப்டம்பர் மாதத்தில் பெட்ரோல் விலை 7.1 சதவீதம் உயர்ந்ததாக அமெரிக்க எரிசக்தி தகவல் நிர்வாகத்தின் தரவுகள் தெரிவிக்கின்றன. எரிபொருள் விலை அதிகரிக்கும்போது போக்குவரத்து மற்றும் பொருட்கள் விநியோகச் செலவுகளும் உயரக்கூடும்.
பணவீக்கத்தைக் கட்டுப்படுத்த மத்திய வங்கி வட்டி விகிதங்களை உயர்த்தலாம். ஆனால் வட்டி விகிதங்களை உயர்த்துவது கடன் வாங்கும் செலவை அதிகரித்து, வீடு வாங்குதல், வணிக முதலீடுகள் மற்றும் நுகர்வுச் செலவுகளைக் குறைக்கக்கூடும்.
Reuters வெளியிட்ட சந்தைத் தகவலின்படி, அக்டோபர் 27–28 கூட்டத்தில் வட்டி விகிதம் உயர்த்தப்படுவதற்கான சாத்தியம் குறித்த முதலீட்டாளர்களின் எதிர்பார்ப்பு பணவீக்கத் தரவுக்குப் பிறகு அதிகரித்துள்ளது. இருப்பினும், வட்டி விகித உயர்வு இன்னும் உறுதிப்படுத்தப்படவில்லை.
இதனால் உலக நாடுகளுக்கு தாக்கங்கள் ஏற்பட வாய்ப்புக்கள் அதிகமாகவும் உள்ளது
அமெரிக்க டொலரின் மதிப்பு உயர்ந்தால் பிற நாணயங்கள் அழுத்தத்தைச் சந்திக்கலாம்.
அமெரிக்க வட்டி விகிதங்கள் அதிகரித்தால், வளர்ந்து வரும் நாடுகளிலிருந்து முதலீடுகள் வெளியேறும் அபாயம் ஏற்படலாம்.
டொலரில் கடன் பெற்றுள்ள நாடுகளுக்கு கடன் திருப்பிச் செலுத்தும் செலவு அதிகரிக்கலாம்.
உலகப் பங்குச் சந்தைகளில் ஏற்ற இறக்கங்கள் ஏற்படலாம். மேலும் அமெரிக்காவின் பணவீக்கம் அந்நாட்டு மக்களின் வாழ்க்கைச் செலவை மட்டுமல்லாமல், சர்வதேச முதலீடு, நாணய மாற்று விகிதம் மற்றும் கடன் சந்தைகளையும் பாதிக்கக்கூடியது என்பதும் குறிப்பிடத்தக்கது
