உச்ச நீதிமன்றத்தை நோக்கி காங்கிரஸ் கட்சி நடத்திய போராட்டப் பேரணியில் பங்கேற்ற அனைவருக்கும் மக்களவை எதிர்க்கட்சித் தலைவர் ராகுல் காந்தி நன்றி தெரிவித்துள்ளார்.
அரசியலமைப்பு மற்றும் ஜனநாயகத்தின் கொலைகாரர்களுக்கு எதிராக ஒவ்வொரு தனிமனிதரும் உறுதியாக நிற்பார்கள் என்று அவர் கூறியுள்ளார்.
இது தொடர்பாக அவர் வெளியிட்டுள்ள எக்ஸ் தளப் பதிவில், ஆதரவு தெரிவித்த லட்சக்கணக்கான மக்களுக்கும், ‘இந்தியா’ கூட்டணியின் தலைவர்களுக்கும், காங்கிரஸ் மற்றும் அதன் கூட்டணி கட்சிகளின் தொண்டர்களுக்கும் நன்றி தெரிவித்துள்ளார்.
மிரட்டலுக்கு இந்திய மக்கள் பணியமாட்டார்கள் என்பதை அரசுக்கு காட்ட வேண்டியிருந்தது எனக் குறிப்பிட்டுள்ள அவர், எங்களை அடிக்கவோ, அச்சுறுத்தவோ அல்லது பயமுறுத்தவோ உங்களால் முடியாது என்றும், அடக்குமுறையை நாங்கள் ஏற்றுக்கொள்ள மாட்டோம் என்றும் மத்திய அரசை சாடியுள்ளார்.
மேலும், தனித்தனிப் போராட்டங்கள் எதுவும் இல்லை என்றும், அனைவரும் ஒன்றாக இணைந்து நடத்தும் ஒரே போராட்டம் இதுதான் என்றும் அவர் வலியுறுத்தியுள்ளார்.
வருகை தந்து ஆதரவளித்த சிவில் சமூக அமைப்புகளைச் சேர்ந்த அனைவருக்கும் நன்றி தெரிவிப்பதாகக் கூறியுள்ள அவர், வீதிகளில் இறங்கிப் போராடிய ஒவ்வொரு நபர் குறித்தும் தாம் பெருமிதம் கொள்வதாகத் தெரிவித்துள்ளார்.
