சவூதி அரேபியாவின் தலைநகர் ரியாதில் உள்ள மன்னர் காலித் சர்வதேச விமான நிலையத்தின் மீது சனிக்கிழமை நடத்தப்பட்ட தாக்குதலில் பலர் காயமடைந்துள்ளதாக நாட்டின் சிவில் விமான போக்குவரத்து அதிகாரசபை தெரிவித்துள்ளது.
இந்தத் தாக்குதலைத் தொடர்ந்து அங்குள்ள அனைத்து செயல்பாடுகளும் இடைநிறுத்தப்பட்டுள்ளன.
இந்தத் தாக்குதலுக்கு உடனடியாக எந்தவொரு அமைப்பும் உரிமை கோரவில்லை.
இருப்பினும், சவூதி அரேபியாவுக்கு எதிராக ஏமனின் ஈரான் ஆதரவு ஹூதி அமைப்பினரால் மேற்கொள்ளப்பட்டு வரும் ஏவுகணைத் தாக்குதல்களின் தீவிரமடைதலுக்கு மத்தியிலேயே இச்சம்பவம் இடம்பெற்றுள்ளது.
இவ்வாரத்தில் ஏற்கனவே மேற்கொள்ளப்பட்ட இரு தாக்குதல்களில் நால்வர் உயிரிழந்த நிலையில், தற்போது மூன்றாவது முறையாக இந்த விமான நிலையம் தாக்கப்பட்டுள்ளது.
சவூதியின் முன்னெச்சரிக்கை அமைப்பு இத்தாக்குதல் குறித்து எந்த எச்சரிக்கையையும் விடுக்கவில்லை.
விமான நிலையத்திற்குள் வெடிப்புச் சம்பவம் இடம்பெற்றதாகவும், புறப்படும் வாயிலுக்கு அருகில் மேற்கூரை இடிந்து விழுந்ததில் பலர் காயமடைந்து கிடந்ததாகவும் சம்பவத்தை நேரில் பார்த்தவர்களும் பாதிக்கப்பட்ட பயணி ஒருவரும் தெரிவித்துள்ளனர்.
அத்துடன் 12-க்கும் மேற்பட்ட அவசர ஆம்புலன்ஸ் வாகனங்கள் விரைந்ததையும் அவர்கள் கண்டுள்ளனர்.
இத்தாக்குதலைத் தொடர்ந்து, ரியாத் செல்லும் அனைத்து விமானங்களும் திருப்பி விடப்பட்டுள்ளதாகவோ அல்லது ரத்து செய்யப்பட்டுள்ளதாகவோ ‘flightradar24’ இணையதளம் தெரிவித்துள்ளது.
குவைத் ஏர்வேஸ், எதிஹாட் ஏர்வேஸ் மற்றும் கட்டார் ஏர்வேஸ் உள்ளிட்ட பல விமான நிறுவனங்கள் தங்கள் சேவைகளை ரத்து செய்துள்ளன.
ரியாதில் முக்கிய ஆற்றல் மற்றும் முதலீட்டு மாநாடுகள் நடைபெறவுள்ள நிலையிலேயே இந்நடவடிக்கை எடுக்கப்பட்டுள்ளது.
இருப்பினும் அம்மாநாடுகள் திட்டமிட்டபடி நடைபெறும் என அமைப்பாளர்கள் தெரிவித்துள்ளனர்.
இதனிடையே, அமெரிக்க ஜனாதிபதி டொனால்ட் டிரம்ப் ஊடகவியலாளர்களிடம் கருத்து தெரிவிக்கையில், ஹூதிகளுக்கு எதிரான சவூதியின் தாக்குதலில் அமெரிக்கா இணைவது குறித்து பரிசீலித்து முடிவெடுக்கப்படும் எனக் கூறியுள்ளார்.
மேலும், ரியாதில் உள்ள அமெரிக்க, பிரித்தானிய, அயர்லாந்து மற்றும் கனடிய தூதரகங்கள் இச்சம்பவம் குறித்து விழிப்புடன் இருக்குமாறும், விமான நிலையப் பகுதிகளைத் தவிர்க்குமாறும் கேட்டுக்கொண்டுள்ளன.
ஏமனின் சவூதி ஆதரவு அரசாங்கம் இராணுவ நடவடிக்கையைத் தொடங்கியதை அடுத்து, சவூதி வான்வெளியை இராணுவ மண்டலமாக அறிவித்துள்ள ஹூதிகள், அங்கு விமானப் பயணங்களைத் தவிர்க்குமாறு எச்சரித்துள்ளனர்.
