மன்னார் மாவட்ட மீனவர்கள் உள்ளிட்ட நாட்டின் அனைத்து மீனவர்களுக்கும், அனர்த்த காலங்களில் உடனடி நிவாரணம் வழங்குவதற்கான நடவடிக்கைகளை அரசாங்கம் மேற்கொள்ள வேண்டும் என வன்னி மாவட்ட பாராளுமன்ற உறுப்பினர் செல்வம் அடைக்கலநாதன் கோரிக்கை விடுத்துள்ளார்.
மன்னாரில் இன்று திங்கட்கிழமை மதியம் இடம்பெற்ற ஊடக சந்திப்பில் கருத்து தெரிவித்த அவர், புயல், கடல் கொந்தளிப்பு மற்றும் மோசமான வானிலை காரணமாக கடலுக்கு செல்ல வேண்டாம் என அரசாங்கம் மீனவர்களுக்கு அறிவுறுத்துகின்ற போதிலும், தொழிலுக்குச் செல்ல முடியாமல் பாதிக்கப்படும் மீனவர்களுக்கு உரிய நிவாரணம் வழங்கப்படவில்லை என கவலை வெளியிட்டார்.
அனர்த்தங்கள் தொடரும் காலங்களில் பல நாட்கள் கடலுக்குச் செல்ல முடியாத நிலையில் மீனவர்கள் தங்களது அன்றாட குடும்பச் செலவுகள் மற்றும் பிள்ளைகளின் கல்விச் செலவுகளை சமாளிக்க முடியாத நிலைக்கு தள்ளப்படுவதாக அவர் தெரிவித்தார்.
ஜனாதிபதி மன்னாருக்கு வருகை தந்தபோது மீனவர்களுக்கு உடனடியாக நிவாரணம் வழங்க வேண்டும் என உத்தரவிட்டிருந்த போதிலும், இதுவரை அதற்கான நடவடிக்கைகள் மேற்கொள்ளப்படவில்லை என்றும் செல்வம் அடைக்கலநாதன் குறிப்பிட்டார்.
புயலால் வலைகள் சேதமடைந்தும், கடலில் வலைகள் தொலைந்தும் பாதிக்கப்பட்ட மீனவர்களுக்கு இதுவரை நஷ்டஈடு வழங்கப்படவில்லை எனவும் அவர் தெரிவித்தார். உடைந்த படகுகளுக்கான நஷ்டஈடு குறைந்த எண்ணிக்கையிலான படகுகளுக்கே வழங்கப்பட்டுள்ளதாகவும் அவர் கூறினார்.
மேலும், கடந்த இரண்டு மாதங்களுக்கு முன்னர் இடம்பெற்ற மீனவ அதிகாரிகளுடனான கூட்டத்தில் எடுக்கப்பட்ட தீர்மானங்கள் இதுவரை நடைமுறைப்படுத்தப்படவில்லை எனவும் அவர் குற்றம் சாட்டினார்.
பாஸ் வழங்கப்பட்டு தொழிலுக்குச் சென்று வந்த சில மீனவர்கள், தற்போது பாஸ் இல்லாத காரணத்தால் தொழிலுக்குச் செல்ல முடியாத நிலை ஏற்பட்டுள்ளதாகவும் அவர் தெரிவித்தார்.
இந்த விவகாரத்தை நாடாளுமன்றத்திலும் முன்வைக்கப் போவதாக தெரிவித்த செல்வம் அடைக்கலநாதன், அனர்த்தங்களால் தொழிலுக்குச் செல்ல முடியாத அனைத்து மீனவர்களுக்கும் நிவாரணம் வழங்கும் திட்டத்தை அடுத்த வரவு செலவுத் திட்டத்திலாவது அரசாங்கம் அறிவிக்க வேண்டும் என கோரிக்கை விடுத்துள்ளார்.
அத்துடன், இந்திய இழுவைப்படகுகளின் வருகையும் மன்னார் மாவட்ட மீனவர்களுக்கு பாதிப்பை ஏற்படுத்தி வருவதாக அவர் தெரிவித்துள்ளார்.
