காசா பகுதியில் இஸ்ரேல் மேற்கொண்டு வரும் கொடூரத் தாக்குதல்களையும், போரையும் தடுப்பதற்குத் தானும் தனது யூத சமூகத்தினரும் தங்களால் இயன்ற பங்களிப்பைச் செய்யத் தவறிவிட்டதாகக் கனடாவின் கூட்டாட்சி புதிய ஜனநாயகக் கட்சியின் (NDP) தலைவர் ஆவி லூயிஸ் (Avi Lewis) சமூக வலைதளத்தில் தெரிவித்த கருத்துக்கள் கனடிய அரசியல் களத்தில் பெரும் விவாதத்தையும் கடும் விமர்சனங்களையும் தோற்றுவித்துள்ளன.
யூதர்களின் மிகக் புனிதமான நாளான யோம்கிப்பூர் (Yom Kippur) தினத்தன்று, ‘X’ தளத்தில் பதிவொன்றை வெளியிட்ட ஆவி லூயிஸ், “யூத மக்களைப் பொறுத்தவரை தனிப்பட்ட வாழ்வியல் அம்சங்கள் எப்போதுமே அரசியலோடும், அரசியல் அம்சங்கள் எப்போதுமே தனிப்பட்ட வாழ்வோடும் பிணைக்கப்பட்டுள்ளன.” எனவும் ”இந்த ஆண்டில், யூதர்களின் பெயரால் முன்னெடுக்கப்படும் ஒரு தொடர் இனப்படுகொலையைத் (Ongoing Genocide) தடுத்து நிறுத்துவதற்கு தாம் தமது கடமையை முறையாகச் செய்யத் தவறிவிட்டதாகவும்” குறிப்பிட்டிருந்தார்.
யூத மதத்தைச் சேர்ந்தவரான ஆவி லூயிஸின் இந்தப் பதிவு, இஸ்ரேல் காசா மீது நடத்தி வரும் ராணுவ நடவடிக்கைகளுக்கு யூத மக்கள் அனைவரையும் கூட்டுப் பொறுப்பாக்கும் (Collective Responsibility) வகையில் அமைந்துள்ளதாக நாடாளுமன்ற உறுப்பினர்கள் மற்றும் அமைப்புகள் கண்டனம் தெரிவித்துள்ளன.
ஆவி லூயிஸின் கருத்துக்களுக்குக் நாட்டின் ஆளும் லிபரல் கட்சியைச் சேர்ந்த யூத நாடாளுமன்ற உருப்பினர்களான அந்தோணி ஹவுஸ்ஃபாதர் (Anthony Housefather) மற்றும் பென் கர் (Ben Carr) ஆகியோர் பகிரங்க எதிர்ப்புத் தெரிவித்துள்ளனர்.
ஆவி லூயிஸின் பதிவு மிகவும் “வெறுக்கத்தக்கது” (Despicable) எனக் குறிப்பிட்டதுடன், வெளிநாட்டில் உள்ள ஒரு நாட்டின் ராணுவ நடவடிக்கைகளுக்குக் கனடாவில் வாழும் யூதர்களைப் பொறுப்பாளிகளாக்குவது முற்றிலும் தவறானது என்று அந்தோணி ஹவுஸ்ஃபாதர் விமர்சித்துள்ளமை குறிப்பிடத்தக்கது.
