அமெரிக்க அதிபர் டொனால்ட் ட்ரம்ப் நிர்வாகம் வெளியிட்டுள்ள புதிய பட்டியலில், இந்தியாவும் முக்கிய போதைப்பொருள் கடத்தல் அல்லது சட்டவிரோத போதைப்பொருள் உற்பத்தி நடைபெறும் நாடுகளில் ஒன்றாக இடம்பெற்றுள்ளது.
2027ஆம் நிதியாண்டுக்காக வெளியிடப்பட்டுள்ள இந்தப் பட்டியலில், இந்தியாவுடன் சீனா, பாகிஸ்தான், ஆப்கானிஸ்தான், மெக்சிகோ, கொலம்பியா உள்ளிட்ட மொத்தம் 23 நாடுகள் இடம்பெற்றுள்ளன.
எனினும், இந்தப் பட்டியலில் ஒரு நாடு இடம்பெறுவது, அந்த நாட்டின் அரசாங்கமே போதைப்பொருள் கடத்தல் அல்லது உற்பத்தியை ஆதரிக்கிறது என்ற நேரடி குற்றச்சாட்டை குறிக்காது என அமெரிக்கா விளக்கமளித்துள்ளது.
ஒரு நாட்டின் புவியியல் அமைப்பு, சர்வதேச வர்த்தகப் பாதைகள் மற்றும் அந்த நாட்டின் வழியாக போதைப்பொருட்கள் அல்லது அவற்றை தயாரிக்கப் பயன்படுத்தப்படும் ரசாயனங்கள் கடத்தப்படுவதற்கான வாய்ப்பு உள்ளிட்ட காரணிகளும் இந்த வகைப்பாட்டில் கணக்கில் எடுத்துக்கொள்ளப்படுகின்றன.
இதற்கிடையில், இந்தியாவில் சட்டவிரோதமாக மேற்கொள்ளப்படும் அபின் செடி சாகுபடியை கட்டுப்படுத்துவதற்காக இந்திய அரசாங்கம் மேற்கொண்டு வரும் நடவடிக்கைகளுக்கு அதிபர் ட்ரம்ப் பாராட்டு தெரிவித்துள்ளதாகவும் தகவல்கள் வெளியாகியுள்ளன.
மேலும், இந்தப் பட்டியலில் இடம்பெற்றுள்ள அனைத்து நாடுகளும் போதைப்பொருள் தடுப்பு நடவடிக்கைகளில் தோல்வியடைந்த நாடுகள் என அர்த்தப்படுத்த முடியாது.
ஆப்கானிஸ்தான், பொலிவியா, மியான்மர் மற்றும் கொலம்பியா உள்ளிட்ட சில நாடுகள் சர்வதேச போதைப்பொருள் எதிர்ப்பு கடமைகளை நிறைவேற்றுவதில் போதுமான நடவடிக்கை எடுக்கவில்லை என அமெரிக்கா தனியாகக் குறிப்பிட்டுள்ளது.
இந்த நிலையில், இந்தியா இந்தப் பட்டியலில் இடம்பெற்றிருப்பது சர்வதேச அளவில் கவனம் பெற்றுள்ளதுடன், இந்தியாவின் போதைப்பொருள் தடுப்பு நடவடிக்கைகள் குறித்தும் மீண்டும் விவாதத்தை ஏற்படுத்தியுள்ளது.
