மொன்றியல் (Montreal) நகரில் வீடியோ கேம் வடிவமைப்பாளர்கள் மற்றும் தொழிலாளர்கள் ஒன்றிணைந்து மாபெரும் கவனயீர்ப்புப் போராட்டத்தை முன்னெடுத்துள்ளனர்.
உலகின் முன்னணி தொழில்நுட்பத் தகவல் நிறுவனமான மைக்ரோசாப்ட் (Microsoft), தனது எக்ஸ்பாக்ஸ் (Xbox) மற்றும் பெதஸ்தா கேம் ஸ்டுடியோஸ் (Bethesda Game Studios) ஆகிய பிரிவுகளில் மேற்கொண்டுள்ள பாரிய ஆட்குறைப்பு நடவடிக்கைக்கு எதிர்ப்புத் தெரிவித்தே, இந்தப் போராட்டம் முன்னெடுக்கப்பட்டது.
மைக்ரோசாப்ட் நிறுவனத்திற்குச் சொந்தமான மொன்றியல் பெதஸ்தா கேம் ஸ்டுடியோவின் ஊழியர்கள், தங்களின் மதிய உணவு இடைவேளையைப் பயன்படுத்தி இந்த வீதிப் போராட்டத்தை நடத்தினர்.
மைக்ரோசாப்ட் நிறுவனம் தனது எக்ஸ்பாக்ஸ் கேமிங் பிரிவில், உலகளாவிய ரீதியில் சுமார் 3,200 ஊழியர்களை பணிநீக்கம் செய்வதாக அறிவித்ததைத் தொடர்ந்து, இந்த அதிரடிப் போராட்டம் வெடித்துள்ளது.
குறிப்பாக, மொன்றியல் ஸ்டுடியோவில் பணியாற்றிய 12 ஊழியர்கள், அமெரிக்காவிலிருந்து முன்னெடுக்கப்பட்ட வெறும் 3 நிமிட வீடியோ உரையாடல் மூலம் பணிநீக்கம் செய்யப்பட்டமைக்கு கடும் கண்டனங்களை, போராட்டக்காரர்கள் வெளிப்படுத்தினர்.
தற்போது மொன்றியல் பெதஸ்தா ஸ்டுடியோவின் ஊழியர்கள் தங்களின் முதலாவது கூட்டு ஒப்பந்தத்திற்கான (First Collective Agreement) சட்டப்பூர்வ பேச்சுவார்த்தைகளில் நிர்வாகத்துடன் ஈடுபட்டு வருகின்றனர்.
பேச்சுவார்த்தை நடைபெற்றுவரும் இவ்வாறானதொரு முக்கிய காலகட்டத்தின் நடுவே, இந்த ஆட்குறைப்பு இடம்பெற்றுள்ளதால், இது முற்றிலும் சட்டவிரோதமானது என்று ஊழியர்கள் சுட்டிக்காட்டியுள்ளனர்.
