கியூபெக் மாகாணத்தில் நடைபெறவுள்ள பொதுத்தேர்தலுக்கான களம் சூடுபிடித்துள்ள நிலையில், வெளியிடப்பட்டுள்ள புதிய லெஜர் (Léger) கருத்துக்கணிப்பு முடிவுகளில், எதிர்க்கட்சியான ‘பார்டி கியூபெக்வா’ (Parti Québécois – PQ) கட்சி வாக்காளர்களின் அமோக ஆதரவுடன் முதலிடத்தைப் பெற்றுள்ளது.
தற்போதைய கியூபெக் முதல்வர் கிறிஸ்டின் பிரெஷெட் (Christine Fréchette) தலைமையிலான ஆளும் CAQ கட்சி, மக்களின் ஆதரவை பெருமளவு இழந்து மூன்றாவது இடத்திற்குத் தள்ளப்பட்டுள்ளதாக கருத்துக்கணிப்பு முடிவுகள் தெரிவிக்கின்றன. லெஜர் நிறுவனம் நடத்திய இந்த விரிவான இணையவழி ஆய்வில், கியூபெக் மாகாண அளவில் நிலவும் தற்போதைய அரசியல் அலைகள் மிகத் தெளிவாகப் பிரதிபலித்துள்ளன.
அதன்படி, கியூபெக்கின் பாரம்பரிய எதிர்க்கட்சியான லிபரல் கட்சி 21 சதவீத ஆதரவைப் பெற்று இரண்டாவது இடத்திற்கு முன்னேறியுள்ளது. இடதுசாரி கொள்கையுடைய கியூபெக் சொலிடேர்(Québec solidaire) கட்சி 13 சதவீத ஆதரவையும், எரிக் டுஹைமின் கன்சர்வேட்டிவ் கட்சி (PCQ) 9 சதவீத ஆதரவையும் பெற்றுள்ளன.
கியூபெக்கின் பெரும்பான்மைச் சமூகமான பிரெஞ்சு மொழி பேசுவோரிடையே (Francophones) பார்டி கியூபெக்வா (PQ) கட்சி 43 சதவீத வாக்குகளை பெற்றுள்ளது.
மொன்றியல் (Montreal) பிராந்தியத்தில் மட்டும் ஆங்கிலம் மற்றும் இதர மொழி பேசுவோரின் (Non-Francophones) பலத்த ஆதரவோடு லிபரல் கட்சி இன்னும் தனது செல்வாக்கைத் தக்கவைத்துக் கொண்டுள்ளது.
கட்சிகளின் செல்வாக்கைத் தாண்டி, “கியூபெக் மாகாணத்தின் சிறந்த முதலமைச்சராக யாரை விரும்புவீர்கள்?” என்ற தனிநபர் சார் கேள்விக்கான பதிலாக, 24 சதவீத மக்கள் பிளாமோண்டனே கியூபெக்கிற்குத் தலைமை தாங்கச் சிறந்த தலைவர் எனத் தேர்வு செய்துள்ளனர்.
அண்மைக் காலமாகப் பொருட்கள் மற்றும் சேவைகளின் விலைவாசி உயர்வு (Inflation), அமெரிக்க அதிபர் டொனால்ட் டிரம்பின் இறக்குமதி வரி அச்சுறுத்தல்களை ஆளும் கட்சி கையாண்ட விதம் மற்றும் உள்கட்டமைப்புத் திட்டங்களில் ஏற்பட்ட தாமதங்கள் ஆகியவை, ஆளும் CAQ கட்சியின் மீதான மக்களின் நம்பிக்கையைக் குலைத்துள்ளதாக அரசியல் ஆய்வாளர்கள் சுட்டிக்காட்டுகின்றனர்.
