கனடா, அமெரிக்கா மற்றும் மெக்சிகோ ஆகிய நாடுகளுக்கு இடையிலான ‘CUSMA’ வர்த்தக ஒப்பந்தத்தை மறுசீரமைப்பதற்கான பேச்சுவார்த்தைகள், நிர்ணயிக்கப்பட்ட ஜூலை 1-ஆம் திகதி காலக்கெடுவைத் தாண்டியும் நீடிக்கக்கூடும் எனத் தெரிவிக்கப்பட்டுள்ளது.
அமெரிக்க வர்த்தகப் பிரதிநிதி ஜேமிசன் கிரீர் (Jamieson Greer) இந்த தகவலைத் தெரிவித்துள்ளார்.
வாஷிங்டனில் உள்ள ஹட்சன் நிறுவனத்தில் நடைபெற்ற கலந்துரையாடலில் கலந்துகொண்ட ஜேமிசன் கிரீர் இது குறித்த முக்கிய விபரங்களை வெளியிட்டார்.
அனைத்துப் பிரச்சினைகளையும் ஜூலை 1-ஆம் திகதிக்குள் தீர்க்க முடியும் என்று தாம் நினைக்கவில்லை எனவும் ஆனால், பல முக்கிய விடயங்களில் முன்னேற்றம் கண்டுள்ளதாகவும் அவர் குறிப்பிட்டுள்ளார்.
மெக்சிகோவுடனான பேச்சுவார்த்தைகள் வேகமாக நடைபெற்று வரும் அதேவேளையில், கனடாவுடனான பேச்சுவார்த்தையில் தொய்வு நிலவுவதாக அமெரிக்க வர்த்தகப் பிரதிநிதி ஜேமிசன் கிரீர் (Jamieson Greer) சுட்டிக்காட்டினார்.
குறிப்பாக, கனடாவின் பால் பண்ணைத் துறை (Supply Management), கனேடிய மாகாணங்களின் மதுபானக் கொள்கைகள் மற்றும் “கனேடியப் பொருட்களை வாங்குவதற்கு வலியுறுத்தும் தன்மை” (Buy Canadian) போன்ற கொள்கைகள் அமெரிக்காவுக்குப் பெரும் முரண்பாடுகளாக உள்ளமை குறிப்பிடத் தக்கது.
