காசா நகரில் சனிக்கிழமை (21.11.2026) இஸ்ரேலியப் படைகள் நடத்திய தாக்குதலில் லொறி ஒன்றிலிருந்த மூவர் உயிரிழந்துள்ளதாக காசா சுகாதார அமைச்சு தெரிவித்துள்ளது.
குறித்த லொறியில் உணவுப் பொருட்களும் ‘வேர்ல்ட் சென்ட்ரல் கிச்சன்’ (World Central Kitchen) தொண்டு நிறுவனத்தின் சின்னம் பொறிக்கப்பட்ட ஆவணங்களும் இருந்ததாக நேரில் பார்த்தவர்கள் தெரிவித்துள்ளனர்.
தாக்குதலின் பின்னர், வாகனத்திலிருந்த சமைத்த சோற்றுப் பொதிகளில் அந்தத் தொண்டு நிறுவனத்தின் சின்னம் பொறிக்கப்பட்ட தாள்கள் காணப்பட்டதாக நேரில் பார்த்தவர்கள் கூறியுள்ளனர்.
எனினும், தாக்குதலுக்கு உள்ளான வாகனம் தமது நிறுவனத்துடன் தொடர்புடையதல்ல என ‘வேர்ல்ட் சென்ட்ரல் கிச்சன்’ அறிக்கை ஒன்றின் மூலம் தெளிவுபடுத்தியுள்ளது.
அந்த வாகனத்தின் சாரதி முன்னர் தமது நிறுவனத்தில் பணியாற்றியவர் என்றும், வாகனத்திலிருந்த ஏனைய இருவரும் தமது பணியாளர்கள் அல்ல என்றும் அந்நிறுவனம் குறிப்பிட்டுள்ளது.
அதேவேளை, அப்பகுதியிலிருந்த இஸ்லாமிய ஜிஹாத் போராளிகளை இலக்கு வைத்தே தமது படைகள் தாக்குதல் நடத்தியதாகவும், அந்த வாகனம் அமைப்பின் உறுப்பினர்களுக்கு உணவு கொண்டு சென்றதாகவும் இஸ்ரேலிய இராணுவம் தெரிவித்துள்ளது.
இஸ்ரேலிய இராணுவத்தின் இந்தக் கூற்றை சுயாதீனமாக உறுதிப்படுத்த முடியவில்லை என ராய்ட்டர்ஸ் குறிப்பிட்டுள்ளதுடன், இஸ்லாமிய ஜிஹாத் அமைப்பும் இது குறித்து உடனடியாக எந்தக் கருத்தையும் வெளியிடவில்லை.
முன்னதாக இவ்வாரத்தில், ஹமாஸ் தளபதி ஒருவரை இலக்கு வைத்து வைத்தியசாலை மீது இஸ்ரேல் நடத்திய தாக்குதலில் அறுவர் கொல்லப்பட்டனர்.
2025 அக்டோபரில் அமெரிக்க ஆதரவுடன் எட்டப்பட்ட போர் நிறுத்தம் பாரிய மோதல்களை நிறுத்தியிருந்தாலும், காசா மீதான இஸ்ரேலியத் தாக்குதல்களைத் தடுக்கவில்லை.
அதன்பின்னர் இதுவரை குறைந்தது 1,600 பலஸ்தீனியர்களும் ஐந்து இஸ்ரேலியப் படைவீரர்களும் கொல்லப்பட்டுள்ளனர்.
தற்போது காசாவின் சுமார் மூன்றில் இரண்டு பகுதி இஸ்ரேலியப் படைகளின் கட்டுப்பாட்டில் உள்ள நிலையில், கடற்கரையோரத்தின் சிறிய பகுதியே ஹமாஸ் வசம் உள்ளது.
இரண்டு ஆண்டுகளுக்கும் மேலாகத் தொடரும் இஸ்ரேலின் தாக்குதல்களால் பல்லாயிரக்கணக்கானோர் உயிரிழந்துள்ளதுடன், பசிப் பட்டினி நெருக்கடியும் ஏற்பட்டுள்ளது.
2023 அக்டோபரில் ஹமாஸ் தலைமையிலான போராளிகள் 1,200 பேரைக் கொன்று 250-க்கும் மேற்பட்டோரைப் பணயக்கைதிகளாகப் பிடித்துச் சென்றதைத் தொடர்ந்து, தற்காப்புக்காகவே தாம் செயற்படுவதாக இஸ்ரேல் தெரிவித்து வருகின்றது.
