முல்லைத்தீவு – கோம்பாவில் பகுதியில், ஐந்திற்கும் மேற்பட்ட நாய்களுக்கு விலங்கு விசர் நோய் தடுப்பூசி ஏற்றாமல் வளர்த்து வந்த நாய் உரிமையாளருக்கு எதிராக முல்லைத்தீவு நீதிமன்றத்தில் வழக்குத் தாக்கல் செய்யப்பட்டுள்ளது.
குறித்த நாய்கள் வீதியால் பயணிப்பவர்களை அச்சுறுத்துவதாகப் பொதுமக்களிடமிருந்து முறைப்பாடுகள் கிடைத்ததைத் தொடர்ந்து, கோம்பாவில் பொது சுகாதாரப் பரிசோதகர் விசாரணைகளை முன்னெடுத்து, நாய் உரிமையாளருக்கு எதிராக நீதிமன்றத்தில் வழக்குத் தாக்கல் செய்துள்ளார்.
இந்த வழக்கு விசாரணைக்கு எடுத்துக்கொள்ளப்பட்டபோது, பதில் நீதிபதி நாய் உரிமையாளரைப் பிணையில் செல்ல அனுமதித்துள்ளார். அத்துடன், அவரது வீட்டில் வளர்க்கப்படும் அனைத்து நாய்களுக்கும் விலங்கு விசர் நோய் தடுப்பூசி ஏற்றி, அதற்கான தடுப்பூசி அட்டைகளை எதிர்வரும் டிசம்பர் மாதம் 4ஆம் திகதி நீதிமன்றத்தில் சமர்ப்பிக்குமாறும் உத்தரவிட்டுள்ளார்.
இதேவேளை, நாய்களுக்கான விலங்கு விசர் நோய் தடுப்பூசிகள் இலவசமாக வழங்கப்படுகின்றன. நாய் உரிமையாளர்கள் தமது பிரதேச சுகாதார வைத்திய அதிகாரி பணிமனை அல்லது பொது சுகாதாரப் பரிசோதகர்களைத் தொடர்புகொண்டு தடுப்பூசிகளைப் பெற்றுக்கொள்ள முடியும்.
மேலும், பொது சுகாதாரப் பரிசோதகர்கள் கிராமம் கிராமமாகச் சென்று நாய்களுக்கு தடுப்பூசி ஏற்றப்பட்டுள்ளதா என்பது தொடர்பில் பரிசோதனைகளை மேற்கொண்டு வருகின்றனர்.
எனவே, பொதுமக்களின் பாதுகாப்பையும் நாய்களின் நலனையும் கருத்திற்கொண்டு, வீடுகளில் நாய்களை வளர்ப்போர் உரிய தடுப்பூசிகளைத் தவறாமல் ஏற்றுவதுடன், அவற்றைப் பொறுப்புடன் பராமரிக்க வேண்டும் என வலியுறுத்தப்பட்டுள்ளது.
