லிதுவேனியாவின் வான்பரப்பில் இனந்தெரியாத பறக்கும் பொருள் ஒன்று புகுந்ததையடுத்து, நாட்டின் மத்திய மற்றும் வடக்குப் பகுதி மக்கள் ஞாயிற்றுக்கிழமை(18.10.2026) காலையில் சுமார் ஒரு மணி நேரம் பாதுகாப்பான இடங்களில் தங்கியிருக்குமாறு உத்தரவிடப்பட்டதாக அந்நாட்டு இராணுவமும் தேசிய நெருக்கடி மேலாண்மை மையமும் தெரிவித்துள்ளன.
போலந்தில் இருந்து நுழைந்த ட்ரோன் (Drone) ஒன்றாகவே இது இருக்கலாம் எனத் தெரிவித்துள்ள பாதுகாப்பு அமைச்சர் ரொபெர்டாஸ் கவுனாஸ், இது குறித்து போலந்து அதிகாரிகளுடன் இணைந்து கூட்டு விசாரணை நடத்த முன்மொழிந்துள்ளதாக செய்தியாளர்களிடம் தெரிவித்தார்.
போலந்து இராணுவமும் தனது வான்பரப்பு மீறப்பட்டுள்ளதா என்பது குறித்து ஆய்வு செய்து வருகிறது. எனினும், ரேடார் அமைப்புகள் இந்த பொருள் எல்லையைக் கடந்து லிதுவேனியாவிற்குள் சென்றதை உறுதிப்படுத்தவில்லை என்று போலந்து பாதுகாப்பு அமைச்சக செய்தித் தொடர்பாளர் தெரிவித்தார்.
இந்த ‘சிகப்பு’ எச்சரிக்கை காலப்பகுதியில், நேட்டோ(NATO) போர் விமானங்கள் அப்பகுதிக்கு அனுப்பி வைக்கப்பட்டன.
மேலும் லிதுவேனியாவின் இரண்டாவது பெரிய நகரத்திற்கு அருகில் உள்ள கவுனாஸ் விமான நிலையம் தற்காலிகமாக மூடப்பட்டதாக நெருக்கடி மேலாண்மை மையம் தெரிவித்துள்ளது.
மேகமூட்டமான வானிலை காரணமாக நேட்டோ விமானங்களால் அந்தப் பொருளைக் காட்சிப்பூர்வமாக அடையாளம் காண முடியவில்லை என்பதோடு, அதைச் சுட்டு வீழ்த்தவும் முயற்சி செய்யப்படவில்லை.
ரேடாரில் இருந்து அப்பொருள் மறைந்ததை அடுத்து, வடக்கு லிதுவேனியாவில் உள்ள யுயோட்ஜியோனிஸ் கிராமத்திற்கு அருகில் ட்ரோனின் இடிபாடுகள் இருக்கலாம் என்ற சந்தேகத்தின் அடிப்படையில் லிதுவேனிய இராணுவத்தினர் ஆய்வு செய்து வருகின்றனர்.
இதில் சில இடிபாடுகள் சிவிலியன் வாகனம் ஒன்றின் மீது விழுந்துள்ளதாகவும் தெரிவிக்கப்பட்டுள்ளது.
லிதுவேனிய வான்பரப்பில் பறந்த ட்ரோனுக்குப் பதிலளிக்கும் வகையில் இரண்டு இத்தாலிய யூரோஃபைட்டர் விமானங்கள் அனுப்பப்பட்டதை நேட்டோ அதிகாரி ஒருவர் உறுதிப்படுத்தியுள்ளார்.
இது குறித்து விசாரணை நடைபெற்று வருவதாகத் தெரிவித்த அவர், நேட்டோ அமைப்பு எந்தவொரு அச்சுறுத்தலுக்கும் பதிலளிக்கத் தயாராக இருப்பதாகக் கூறினார்.
இதனிடையே, சாத்தியமான அச்சுறுத்தலைச் சுட்டிக்காட்டி, லிதுவேனியாவின் எல்லையை ஒட்டிய சில பகுதிகளில் அண்டை நாடான லாட்வியா குறுகிய காலத்திற்கு ‘மஞ்சள்’ எச்சரிக்கை விடுத்திருந்தது.
உக்ரேனிய ட்ரோன்கள் சமீபத்திய மாதங்களில் பால்டிக் பிராந்தியத்தில் உள்ள நேட்டோ வான்பரப்பிற்குள் பலமுறை புகுந்துள்ள நிலையில், ரஷ்யாவின் சிக்னல் ஜாமிங் காரணமாகவே அவை பாதை மாறியதாக கெய்வ் தெரிவித்துள்ளமை குறிப்பிடத்தக்கது.
