மொன்றியலைத் தலைமையிடமாகக் கொண்டு இயங்கும் முன்னணி மென்பொருள் நிறுவனமான ‘லைட்ஸ்பீட் காமர்ஸ்’ (Lightspeed Commerce Inc.), ஒட்டுமொத்தமாக 250 பணியிடங்களைக் குறைக்கவுள்ளதாக அறிவித்துள்ளது.
தனது நிறுவனத்தின் செயற்பாடுகளை எளிமைப்படுத்துவதற்காகவும், வாடிக்கையாளர் வளர்ச்சியை இலக்காகக் கொண்டு முதலீடுகளை மேற்கொள்வதற்காகவுமே இந்தப் பணியிடக் குறைப்பு நடவடிக்கையை அந்த நிறுவனம் முன்னெடுக்கவுள்ளது.
ஊழியர்களை வேலைநீக்கம் செய்வது மற்றும் வெறுமையாக உள்ள பணியிடங்களை நிரப்பாமல் விடுவது ஆகிய நடவடிக்கைகளின் மூலம் இந்த ஆள்தேவைக் குறைப்புச் செயற்பாடுகள் மேற்கொள்ளப்படுவதாக ‘லைட்ஸ்பீட் காமர்ஸ்’ நிறுவனம் தெரிவித்துள்ளது.
நிறுவனத்தின் இந்த ஆள்தேவைக் குறைப்பு நடவடிக்கை எந்தெந்தப் பிரிவுகளைப் பாதிக்கிறது என்பது குறித்த மேலதிக விவரங்களை நிறுவனத்தின் செய்தித் தொடர்பாளர் ஸ்டெபானி பிரின்சிவில் (Stephanie Princivil) உடனடியாக வெளியிடவில்லை.
எனினும், அடுத்த மாதம் நிறுவனத்தின் காலாண்டு நிதிநிலை முடிவுகள் வெளியிடப்படும்போது இது தொடர்பான கூடுதல் தகவல்கள் பகிரப்படும் என்று அவர் தெரிவித்துள்ளார்.
