ஆஸ்திரேலியாவின் Melbourne நகரில், இலங்கைப் பிறப்பைச் சேர்ந்த முன்னாள் புத்த பிக்குவொருவருக்கு, ஆறு சிறுமிகளை பாலியல் ரீதியாக துன்புறுத்திய குற்றச்சாட்டில் 13 ஆண்டுகள் 2 மாதங்கள் சிறைத்தண்டனை விதிக்கப்பட்டுள்ளது.
71 வயதான Naotunne Vijitha, Melbourne-ன் தென்கிழக்குப் பகுதியில் உள்ள Dhamma Sarana Buddhist Temple-இல் தலைமை பிக்குவாக பணியாற்றியவர்.
1994 முதல் 2002ஆம் ஆண்டு வரையான காலப்பகுதியில், Springvale மற்றும் Keysborough பகுதிகளில் இயங்கி வந்த கோயில்களில், அப்போது சிறுமிகளாக இருந்த ஆறு பேரை பாலியல் ரீதியாக துன்புறுத்தியதாக அவர் மீது வழக்கு தொடரப்பட்டது.
கடந்த ஆண்டு நடைபெற்ற விசாரணையில், சிறுமிகளுக்கு எதிரான 17 பாலியல் குற்றங்களில் அவர் குற்றவாளி என நீதிமன்றம் தீர்ப்பளித்திருந்தது. இதில் குழந்தை மீது பாலியல் ஊடுருவல் தொடர்பான 9 குற்றங்களும், குழந்தையுடன் அநாகரிகச் செயலில் ஈடுபட்ட 8 குற்றங்களும் அடங்குகின்றன.
இந்த வழக்கில், கோயிலுக்கு வந்த சிறுமிகளிடம் அவர் நம்பிக்கையை ஏற்படுத்தி, இனிப்புகள் மற்றும் chocolate போன்றவற்றைக் கொடுப்பதாகக் கூறி தனது தங்குமிடத்திற்கு அழைத்துச் சென்றதாக நீதிமன்றத்தில் தெரிவிக்கப்பட்டது.
தண்டனை வழங்கிய நீதிபதி Pardeep Tiwana, மதத் தலைவராக அவர் பெற்றிருந்த நம்பிக்கையை பயன்படுத்தி சிறுமிகளை துன்புறுத்தியது மிகவும் தீவிரமான நம்பிக்கைத் துரோகம் எனக் குறிப்பிட்டார்.
குற்றச்செயல்கள் பல ஆண்டுகளுக்கு முன்னர் நடைபெற்றிருந்தாலும், பாதிக்கப்பட்ட பெண்கள் பின்னர் காவல்துறையை அணுகியதைத் தொடர்ந்து விசாரணை முன்னெடுக்கப்பட்டது. Vijitha 2023ஆம் ஆண்டு குற்றச்சாட்டுகளுக்கு முகங்கொடுத்தார்.
அவர் விசாரணையின்போது குற்றச்சாட்டுகளை மறுத்திருந்தார். ஆனால், கடந்த ஆண்டு நீதிமன்றத்தில் நடைபெற்ற jury விசாரணையில் அவர் குற்றவாளி எனத் தீர்ப்பளிக்கப்பட்டது.
தற்போது விதிக்கப்பட்டுள்ள 13 ஆண்டுகள் 2 மாத சிறைத்தண்டனையில், குறைந்தது 9 ஆண்டுகள் 4 மாதங்கள் சிறையில் இருந்த பின்னரே parole பெறுவதற்கான தகுதியை அவர் பெறுவார்.
மேலும், சிறைத்தண்டனை முடிந்த பின்னர் அவர் Australia-வில் இருந்து deportation செய்யப்படுவதற்கான வாய்ப்பும் இருப்பதாக நீதிமன்றத்தில் தெரிவிக்கப்பட்டுள்ளது.
