போலி களைநாசினிகளின் ஊடுருவல்கள் அதிகரித்துள்ளதால் நெற்செய்கை விளைச்சல் வீழ்ச்சியடைந்து விவசாயிகள் பல்வேறு பாதிப்புகளை எதிர்நோக்கி வருவதாக வன்னி மாவட்ட நாடாளுமன்ற உறுப்பினர் துரைராசா ரவிகரன் சுட்டிக்காட்டியுள்ளார்.
எனவே, நெல் விளைச்சலில் வீழ்ச்சியை ஏற்படுத்தும் போலி களைநாசினிகளைக் கட்டுப்படுத்த அரசு விரைந்து நடவடிக்கை எடுக்க வேண்டும் என்றும் அவர் வலியுறுத்தியுள்ளார்.
நாடாளுமன்றில் உரையாற்றும்போதே அவர் மேற்கண்டவாறு தெரிவித்துள்ளார்.
இது தொடர்பில் அவர் மேலும் கருத்துத் தெரிவிக்கையில், மருந்தகங்களில் போலி மருந்துகளை ஆய்வு செய்து கட்டுப்படுத்தும் பொறிமுறையைப் போல, நெற்செய்கையில் பயன்படுத்துவதற்காக கடைகளில் விற்கப்படும் களைநாசினிகளையும் ஆய்வுசெய்து கட்டுப்படுத்தும் பொறிமுறை இலங்கையில் மேலும் முறைப்படுத்தப்பட வேண்டும் என்று குறிப்பிட்டார்.
விவசாயிகள் விலைக்கு வாங்கிப் பயன்படுத்தும் களைநாசினிகளிலும் போலி களைநாசினிகளின் கலப்படம் இருப்பதால், நெற்செய்கையின் விளைச்சலும் பாதிக்கப்படுவதாக விவசாயிகள் முறையிடுவதாக அவர் சுட்டிக்காட்டினார்.
இதனைக் கருத்திற்கொண்டு, இவ்வாறான போலி மருந்துகளின் கட்டுப்பாடு தொடர்பில் அரசு தகுந்த பொறிமுறை ஒன்றை வகுக்க வேண்டும் என்றும் நாடாளுமன்ற உறுப்பினர் துரைராசா ரவிகரன் கேட்டுக்கொண்டார்.
