நடிகர் விஜய் சேதுபதி நடிப்பில் வெளியான ‘மகாராஜா’ திரைப்படம் ஹாலிவுட்டில் மறுதயாரிப்பு செய்யப்பட உள்ளதாக இத்திரைப்படத்தின் தயாரிப்புக் குழு அதிகாரப்பூர்வமாக அறிவித்துள்ளது.
நித்திலன் சுவாமிநாதன் இயக்கத்தில் விஜய் சேதுபதி, அனுராக் காஷ்யப், சாச்சனா நமிதாஸ், திவ்ய பாரதி, அபிராமி, சிங்கம்புலி, முனிஷ்காந்த் மற்றும் நட்டி நடராஜ் ஆகியோர் முக்கிய கதாபாத்திரங்களில் நடித்த இத்திரைப்படம் விமர்சன ரீதியாகவும் வசூல் ரீதியாகவும் பெரும் வரவேற்பைப் பெற்றது.
தி ரூட், திங்க் ஸ்டுடியோஸ் மற்றும் பேஷன் ஸ்டுடியோஸ் ஆகிய நிறுவனங்கள் இணைந்து தயாரித்த இத்திரைப்படத்திற்கு அஜனீஸ் லோக்நாத் இசையமைத்திருந்தார்.
இந்தியாவில் மட்டுமன்றி சர்வதேச அளவிலும் நல்ல வரவேற்பைப் பெற்ற இத்திரைப்படம், சீனாவில் 91.65 கோடி ரூபாய்க்கும் மேல் வசூலித்துள்ளதாகக் கூறப்படுகிறது.
மேலும், வெளிநாட்டு ஓடிடி தளங்களிலும் இத்திரைப்படம் பெரும் கவனம் பெற்றது.
இந்நிலையில், இத்திரைப்படம் தற்போது ஹாலிவுட்டில் மறுதயாரிப்பு செய்யப்படவுள்ளது. இது குறித்துப் பேசிய தயாரிப்பாளர் சுதன் சுந்தரம், படத்தை மறுதயாரிப்பு செய்யவுள்ள நிறுவனம் விஜய் சேதுபதியின் கதாபாத்திரத்தில் நடிப்பதற்கான நடிகரைத் தேர்வு செய்யும் பணியில் தீவிரமாக ஈடுபட்டு வருவதாகவும், அடுத்த ஆண்டில் படப்பிடிப்புப் பணிகள் தொடங்கும் என்றும் தெரிவித்துள்ளார்.
ஹாலிவுட் நடிகர் மேத்யூ மெக்கோனாஹே இக்கதாபாத்திரத்தில் நடிக்க வாய்ப்புள்ளதாக இணையத்தில் தகவல்கள் பரவி வருகின்றமை குறிப்பிடத்தக்கது.
