செயற்கை நுண்ணறிவால் (AI) இந்த தசாப்தத்தின் இறுதிக்குள் மனிதகுலம் அழியக்கூடும் என்ற 10% ஆபத்துக்கூட ஏற்றுக்கொள்ள முடியாதது என AI பாதுகாப்பு குறித்த கவலைகளைச் சுட்டிக்காட்டி, 2026-ஆம் ஆண்டில் OpenAI பொதுப்பங்கு வெளியீட்டுக்கு (IPO) வராது என்று அதன் தலைமை நிர்வாக அதிகாரி சாம் ஆல்ட்மேன் தெரிவித்துள்ளார்.
பாதுகாப்பு தொடர்பான தற்போதைய சூழலில் IPO-க்கு செல்வது தவறான முடிவாக இருக்கும் என்றும், தங்களுக்கு அதுபோன்ற எந்த அழுத்தமும் இல்லை என்றும் ஃபார்ச்சூன் (Fortune) இதழிடம் ஆல்ட்மேன் குறிப்பிட்டுள்ளார். AI ஆபத்து குறித்து பேசிய அவர், 10% அல்லது 8% அல்லது 6% எதுவாக இருந்தாலும், சுயநலமோ அல்லது இலாபத்திற்கான தூண்டுதல்களோ இதற்கு இடையூறாக இருக்கக் கூடாது என்றும், அத்தகைய எந்தவொரு ஆபத்து சதவீதத்தையும் ஏற்றுக்கொள்ளாத வகையில் செயல்பட வேண்டும் என்றும் வலியுறுத்தினார்.
OpenAI-இன் போட்டியாளரான Anthropic நிறுவனத்தின் இரண்டு ஆராய்ச்சியாளர்கள், வேகமாக வளர்ந்து வரும் AI தொழில்நுட்பம் மனிதகுலத்தின் அழிவுக்கு வழிவகுக்கும் என எச்சரித்ததைத் தொடர்ந்து, AI அமைப்புகளைக் கட்டுப்படுத்த புதிய விதிகளைக் கொண்டுவருமாறு அமெரிக்கச் சட்டமியற்றுபவர்கள் வலியுறுத்தி வருகின்றனர். மேலும், AI ஏஜென்ட்கள் வெளிப்புற அமைப்புகளை ஹேக் செய்ய வழிகெட்டுச் செயல்பட்ட சம்பவங்கள் மற்றும் தொழில்நுட்ப ஆபத்துக்கள் காரணமாக AI பாதுகாப்பு ஆராய்ச்சியாளர்கள் நிறுவனங்களை விட்டு விலகியதும் கவலையை ஏற்படுத்தியுள்ளது.
2026-இல் IPO இல்லை என்பதை உறுதிப்படுத்திய ஆல்ட்மேன், பாதுகாப்பு மற்றும் சீரமைப்புக்கு (alignment) தேவையான விஷயங்களை எதிர்கொள்வது உட்பட செய்ய வேண்டிய பணிகள் நிறைய உள்ளதாகக் கூறினார். அத்துடன், AI வளர்ச்சியை மெதுவாக்கவும், பாதுகாப்பு ஆபத்துகளை எதிர்கொள்ள இணைந்து செயல்படவும் OpenAI மற்றும் பிற முன்னணி AI நிறுவனங்கள் ஒரு ஒப்பந்தத்தை எட்ட நெருங்கியிருப்பதாகவும் தெரிவிக்கப்பட்டுள்ளது.
Anthropic CEO டாரியோ அமோடி, AI மாதிரிகளின் திறன்களை மேம்படுத்தும் வேகத்தைக் குறைக்க வேண்டும் என X தளத்தில் தெரிவித்த கருத்தை ஆல்ட்மேன் ஏற்றுக்கொண்டுள்ளார்.
அதேநேரம், Anthropic நிறுவனத்தின் IPO திட்டங்கள் பாதிக்கப்படவில்லை. வரும் அக்டோபர் பாதியில் ஆரம்பப் பொதுப்பங்கு வெளியீட்டைத் தொடங்கி, நவம்பரில் அமெரிக்க இடைக்காலத் தேர்தலுக்குச் சில நாட்களுக்கு முன்பு பட்டியலிடுதலை நிறைவு செய்ய அந்நிறுவனம் எதிர்பார்த்துள்ளதாக தெரிவிக்கப்பட்டுள்ளன.
