அமெரிக்காவிற்கும் ஈரானுக்கும் இடையே நிலவி வரும் போர் பதற்றம் மற்றும் மோதல் சூழல் மிக விரைவில் முடிவுக்கு வரும் என்று அமெரிக்க அதிபர் டொனால்டு டிரம்ப் நம்பிக்கை தெரிவித்துள்ளார். மேலும், இந்த மோதலில் ஈரானால் இனி நீண்ட காலம் தாக்குப்பிடிக்க முடியாது என்றும் அவர் சுட்டிக்காட்டியுள்ளார்.
அமெரிக்க அதிபரின் ஓவல் அலுவலகத்தில் செய்தியாளர்களைச் சந்தித்துப் பேசிய டொனால்ட் டிரம்ப், ஈரான் விவகாரத்தில் தாம் மிக முக்கியமான நடவடிக்கையைத் தொடங்கியதாகக் குறிப்பிட்டார். ஈரான் அணு ஆயுதத்தைப் பெறுவதைத் தடுப்பது உலகப் பாதுகாப்பிற்கு மிகவும் அவசியமானது என்று வலியுறுத்திய அவர், ஈரான் அணு ஆயுதம் ஏந்துவதை அமெரிக்காவோ, மத்திய கிழக்கு நாடுகளோ அல்லது உலக அமைப்போ ஒருபோதும் அனுமதிக்க முடியாது என்றார். ஈரான் கைக்கு அணு ஆயுதம் சென்றால் அது மிகப்பெரிய பேரழிவை ஏற்படுத்தும் என்பதால், இந்தத் தீர்க்கமான நடவடிக்கையை எடுப்பதைத் தவிர அமெரிக்காவிற்கு வேறு வழியில்லை என்றும் அவர் தெளிவுபடுத்தினார்.
உலகின் மிக முக்கியமான எண்ணெய் போக்குவரத்துப் பாதைகளில் ஒன்றான ஹார்முஸ் நீரிணையை அடிப்படையாகக் கொண்டு நிலவி வரும் பதற்றத்தைக் குறைக்கப் பேச்சுவார்த்தைகள் நடைபெற்று வருவதாக அதிபர் டிரம்ப் தெரிவித்தார். அமெரிக்கக் கடற்படையின் தலைமையில் அப்பகுதியில் தீவிர முற்றுகை நடவடிக்கை மேற்கொள்ளப்பட்டு, கடல்வழிப் பாதை தங்களின் கட்டுப்பாட்டில் உள்ளதாகக் கூறிய அவர், பேச்சுவார்த்தைகள் சரியான பாதையில் சென்று கொண்டிருப்பதாகவும் குறிப்பிட்டார். இருப்பினும், கப்பல் போக்குவரத்திற்கு அச்சத்தை ஏற்படுத்தும் வகையில் கடலில் கண்ணிவெடிகள் (Mines) வீசப்படலாம் அல்லது தாக்குதல்கள் நடத்தப்படலாம் என்பதால் வணிகக் கப்பல்கள் கவனமுடன் செயல்பட வேண்டும் என்றும் அவர் எச்சரித்தார்.
அமெரிக்க அதிபரின் இந்த கூற்றுகளுக்கு மத்தியில், ஈரானின் தற்காலிகப் பாதுகாப்பு அமைச்சர் பிரிகேடியர் ஜெனரல் சையத் மஜித் இப்ன் ரெசா நாட்டின் தற்காப்புத் திறன்கள் குறித்துப் பேசுகையில், அமெரிக்கா மற்றும் இஸ்ரேலிடமிருந்து வரும் எந்தவொரு அச்சுறுத்தலுக்கும் ஈரான் கடுமையான மற்றும் தீர்க்கமான பதிலடியைக் கொடுக்கும் என்றும், நாட்டின் பாதுகாப்பை உறுதி செய்ய எந்த முயற்சியையும் கைவிடப்போவதில்லை என்றும் உறுதியளித்துள்ளார்.
