கனடா-அமெரிக்கா-மெக்சிகோ ஒப்பந்தம் (CUSMA) கட்டாய மறுஆய்வுக்கு உட்பட்டுள்ள நிலையில், அமெரிக்கத் தலைநகர் வொஷிங்டனில் இதற்கான
பொது விசாரணைகள் நடைபெறவுள்ளன.
இதற்கு முன்னதாகவே, அமெரிக்காவின் முக்கியத் தொழில்துறை அமைப்புகள், இந்த வர்த்தக ஒப்பந்தத்தைப் பாதுகாத்து நீட்டிக்க வேண்டும் என்றும், கனடா மற்றும் மெக்சிகோவிலிருந்து வரும் பொருட்களின் மீது விதிக்கப்படும் சுங்க வரிகளை (Tariffs) உடனடியாக நிறுத்த வேண்டும் என்றும் டிரம்ப் நிர்வாகத்தை வலியுறுத்தி வருகின்றன.
அமெரிக்க உற்பத்தி, தொழில் மற்றும் சில்லறை வர்த்தகத் துறையின் முன்னணி அமைப்புகள், இந்த ஒப்பந்தம் அமெரிக்கப் பொருளாதாரத்துக்குப் பெரும் நன்மைகளைத் தந்துள்ளதாக அறிக்கைகளைச் சமர்ப்பித்துள்ளன. அமெரிக்காவின் மொத்த உள்நாட்டு உற்பத்தியில் 2.9 டிரில்லியன் டொலர் நிதியைப் பங்களிக்கும் ” தேசிய உற்பத்தியாளர்கள் சங்கம்” என்ற அமைப்பு, “அமெரிக்க உற்பத்திக்குச் சாதகமான வரலாற்றிலேயே சிறந்த வர்த்தக ஒப்பந்தம்” என்று, கனடா-அமெரிக்கா-மெக்சிகோ ஒப்பந்தத்தைப் புகழ்ந்துள்ளது.
சர்வதேச வர்த்தக நிபுணர் ஜூலியன் கராகுவேசியன் (Julian Karaguesian), சமர்ப்பிக்கப்பட்ட சுமார் 1,500 அறிக்கைகளைப் பகுப்பாய்வு செய்துள்ளார். அந்த பகுப்பாய்வின் அடிப்படையில் கருத்து தெரிவித்த, அவர், அமெரிக்கத் தொழில்துறைகளின் வெற்றிக்கு, கனடா மற்றும் மெக்சிகோவின் விநியோகங்களும் சந்தைகளும் இன்றியமையாதவை என்று குறிப்பிட்டுள்ளார்.
