மருத்துவ குணங்கள் நிறைந்த மூலிகைகளை நாம் தினமும் நமது உணவில் சேர்த்துக் கொள்ளும்போது அதனால் கிடைக்கும் நன்மைகள் பல. அது போல தான் புதினாவை தினசரி நாம் சேர்த்துக் கொள்ளும்போது அதில் உள்ள நன்மைகள் நமக்கு கிடைக்கின்றன. இதில் மிக முக்கியமாக புதினா டீயை நீங்கள் தினசரி அருந்துவதற்கு ஏதுவாக உள்ளது.
புதினா நறுமண மிக்கது. அதனால் தான் பல உணவுகளில் புதினாவை சேர்க்கிறோம். அதே நேரம் அதில் அதிக அளவில் மருத்துவ குணங்களும் நிறைந்துள்ளன. புதினாவை உணவில் சேர்ப்பது போன்று புதினா பயன்படுத்தி தேநீர் தயாரிக்கலாம். . புதினாவில் நமது உடலுக்கு தேவையான அத்தியாவசிய ஊட்டச்சத்துகளும் நிறைந்துள்ளன. தினமும் புதினா சாப்பிடுவதன் மூலம் உடலுக்கு கிடைக்கும் நன்மைகள் என்ன என்பதை இங்கு தெரிந்துகொள்ளலாம்.
புதினா மன அழுத்தத்தை நிர்வகிக்கிறது
தினசரி காலையில் எழுந்தவுடன் நம் அனைவருக்கும் ஏதேனும் ஒரு பிரச்சினை குறித்து மண்டையில் ஓடிக்கொண்டே இருக்கும். இதன் காரணமாக மன அழுத்தம் பாதிப்புகள் இருக்கலாம். இதனை நிர்வகிப்பதற்கு நீங்கள் தினசரி காலையில் புதினா டீ அருந்தலாம். மன அழுத்த பிரச்சனைகள் இருக்கும்போது நமது உடல் ஆற்றலை அதிக அளவில் இழக்கிறது. வேலை சுமை, வீட்டு பிரச்சனை என பல்வேறு காரணங்கள் காரணமாக இந்த மன அழுத்தம் ஏற்படுகின்றன. இதை நிர்வகிப்பதற்கு தினசரி புதினா டீ சேர்த்துக் கொள்ளலாம். இது உங்கள் மன அழுத்த பிரச்சனைகளை நிர்வகித்து உங்கள் உடலை ஆற்றலுடன் செயல்பட வைக்க உதவுகிறது.
புதினா டீ குடிப்பது சளி இருமலை தடுக்க உதவுகிறது
புதினாவில் இருக்கும் மெந்தோல் ஆனது இயற்கையாகவே உடலில் தேககமாக உள்ள சளியை உடைத்து வெளியேற்றுகிறது. இதன் சூடான பண்புகள் ஈரப்பதம நிறைந்த பண்புகளானது வறண்ட இருமல் மற்றும் தொண்டைபுண் போன்றவற்றை போக்க உதவும். பருவகால மாற்றத்தில் மழை மற்றும் குளிர்காலங்களில் புதினா டீ குடிப்பது சளி தேக்கத்தை கட்டுப்படுத்த உதவும். மேலும் ஒவ்வாமை அறிகுறிகளுடன் இருக்கும் தும்மல், அரிப்பு மற்றும் மூக்கு ஒழுகுதல் உள்ளிட்ட ஒவ்வாமை எதிர்விளைவு அறிகுறீகளை குறைக்கவும் செய்கிறது.
புதினா டீ குமட்டலை தடுக்க செய்கிறது
புதினா டீ குமட்டல் இருப்பவர்களுக்கு நிவாரணமாக இருக்கும். சிசேரியன் பிரசவத்துக்கு பிறகு பெண்களுக்கு குமட்டல் உணர்வு இருக்கும் அதை குறைக்க புதினா டீ உதவும் என்று ஆய்வு ஒன்று கண்டறிந்துள்ளது. மற்றொரு ஆய்வு ஒன்றில் மிளகுக்கீரை சாறு கலந்த நீரை குடிப்பது கீமோதெரபிக்கு பின் வரும் நோயாளிகளுக்கு குமட்டல் மற்றும் வாந்தி குறைவதற்கும் இடையே தொடர்பை கண்டறிந்துள்ளது.
புதினா கஃபைன் உட்கொள்ளலை தடுக்க செய்கிறது
புதினா டீ இயற்கையாக காஃபைன் அல்லாத மூலிகை தேநீர். புத்துணர்ச்சியூட்டும் சுவையை விரும்பினால் இந்த புதினா தேநீரை உட்கொள்ளலாம். காஃபின் கலந்த சூடான பானங்களான காஃபி மற்றும் ப்ளாக் டீ மற்றும் க்ரீன் டீ போன்றவற்றுக்கு சிறந்த மாற்றாக கருதுகின்றனர். இதில் சில காஃபின் உள்ளது. காஃபினை தவிர்ப்பது குறிப்பாக மதியம் மற்றும் மாலை நேரங்களில் தூக்க பிரச்சனைகள் மற்றும் பதட்டம் படபடப்பு பிரச்சனைகளை குறைக்க உதவும்.
செரிமான பிரச்சனைகளை சரி செய்ய உதவுகிறது
மலச்சிக்கல், மற்றும் செரிமான பிரச்சனைகள் உள்ளவர்கள் தினசரி புதினா டீ அருந்தலாம். இது வயிற்றில் உள்ள செரிமான பிரச்சனைகளை சரி செய்து உடலுக்கு புத்துணர்ச்சியை தருகிறது. மேலும் நமது வயிற்றில் உள்ள கெட்ட பாக்டீரியாக்களை அழிக்கவும் புதினா தேநீரில் உள்ள பண்புகள் உதவுகின்றன. இது நமது உடலில் உணவுகள் எளிதாக உறிஞ்சப்பட்டு துண்டுகளாக உடைத்து எளிதில் செரிமானம் ஏற்பட உதவுகிறது. 2023 ஆம் ஆண்டு நடத்தப்பட்ட ஆய்வுகளில் புதினாவில் உள்ள பண்புகள் உடல் சார்ந்த பிரச்சனை உள்ளவர்களுக்கு செரிமான பாதிப்புகளை சரி செய்ய உதவுகிறது என கூறப்படுகிறது. நமது உடலில் உள்ள கொழுப்புகளை உடைக்கவும் இதில் உள்ள பண்புகள் உதவுகின்றன.
உடல் எடையை நிர்வகிக்க உதவுகிறது
தினசரி புதினா டீ அருந்துவதன் மூலம் உடல் எடையை குறைக்க முடியும் என நிபுணர்கள் கூறுகிறார்கள். எனவே எடை குறைப்பில் ஈடுபட்டுள்ளவர்கள் இதனை தினசரி அவர்களது உணவில் சேர்த்துக் கொள்ளலாம். புதினா டீ குடிப்பதால் நீண்ட நேரத்துக்கு அது பசியை தூண்டாமல் இருக்கிறது. இதனால் தேவையற்ற உணவுகள் உட்கொள்ளப்படுவது தடுக்கப்படுகிறது. மேலும் நமது உடலில் வளர்ச்சிதை மாற்றத்தை அதிகரித்து ஆரோக்கியமான செரிமானத்தை மேம்படுத்துவதன் மூலம் உடல் எடை குறைப்பில் பங்களிக்கிறது. இதனால் உடல் எடை குறைவது மிக எளிதாக நடக்கிறது.
புதினா டீ இயற்கையான வலி நிவாரணி
சூடான புதினா டீ உடல் வலி நிவாரணியாக செயல்படுகிறது. புதினா இலைகளில் இருந்து வெளிப்படும் இயற்கையான மெந்தோல் எண்ணெய் நீராவியானது பதட்டமான மண்டை தசைகளை தளர்த்தி வலியை போக்க செய்கிறது. இதனால் டென்ஷன் தலைவலிக்கு உதவுகிறது. மேலும் புதினா இலையில் இருக்கும் இனிமையான கலவைகள் மாதவிடாய் தசைப்பிடிப்பு தீவிரத்தை குறைக்க உதவும். இலேசான தசைப்பிடிக்கு வலி நிவாரணிகளை அடையாமல் புதினா டீ குடிப்பது பாதுகாப்பாக இருக்கும்.
சுவாசத்திற்கு புத்துணர்ச்சியை தருகிறது
புதினா டீயை தினசரி அருந்துவதன் மூலம் நமது சுவாசம் புத்துணர்ச்சி அடைகிறது. சுவாசத்தில் உள்ள கெட்ட வாசனைகள் நீங்கி நல்ல நறுமணங்கள் வெளிப்படுகின்றன. மேலும் புதினாவில் பாக்டீரியா எதிர்ப்பு மற்றும் பூஞ்சை எதிர்ப்பு பண்புகள் அதிக அளவில் நிறைந்துள்ளது. இது நமது வாய்வழி ஆரோக்கியத்தை மேம்படுத்த உதவுகிறது. தினசரி தேநீர் மூலம் இந்த புதினா டீயை சேர்த்துக் கொள்வது வாய்வழி ஆரோக்கியத்தை அதிகரிக்கும் என கூறப்படுகிறது. இருப்பினும் இது குறித்து அதிகாரப்பூர்வ ஆய்வுகள் எதுவும் இல்லை. பெரும்பாலும் அசைவ உணவுகள், வெங்காயம் சாப்பிட்ட பிறகு வாயில் ஒருவித வாசனை தோன்றும். அதனை சரி செய்யும் நீங்கள் புதினா டீ சேர்த்துக் கொள்ளலாம்.
ஹார்மோன் ஆரோக்கியத்தை மேம்படுத்துகிறது
ஹார்மோன் தொடர்பான பிரச்சனைகளை நிர்வகிப்பதற்கு புதினாவில் உள்ள பண்புகள் உதவுவதாக ஆய்வுகளில் கண்டறியப்பட்டுள்ளது. குறிப்பாக பி சி ஓ எஸ் போன்ற ஹார்மோன் தொடர்பான நிலைமைகளை நிர்வகிக்க இவை உதவுகின்றன . 2020 ஆம் நடத்தப்பட்ட ஆய்வுகளில் இவ்வாறு கூறப்பட்டுள்ளது. இருப்பினும் இது குறித்து இன்னும் கூடுதல் ஆராய்ச்சிகள் தேவை. அதே நேரம் புதினா டீ இணை சிகிச்சையாக உதவும் என்பதால் இது ஹார்மோன் சிகிச்சைகளுக்கு மாற்றாக என்று எடுத்துகொள்ள கூடாது. ஹார்மோன் பிரச்சனைகளை நிர்வகிப்பதற்கு இதுவும் ஒரு சிகிச்சை.
புதினா ஆன்டி மைக்ரோபியல் மற்றும் ஆன்டி வைரல் பண்புகள்
2022 ஆம் ஆண்டு ஆய்வு ஒன்றின் படி புதினா டீயில் வைரஸ் தடுப்பு செயல்பாடு உள்ளது என்பதற்கான ஆரம்ப சோதனைகுழாய் சான்றுகள் உள்ளன. இது கொரோனா நோய் ஏற்படுத்தும் வைரஸுக்கு எதிராக செயல்படுகிறது. எனினும் இதை மட்டுமே நோய்த்தொற்றுகளுக்கு முழுமையான சிகிச்சையாக கருதப்படக்கூடாது. இவை இணை சிகிச்சையாக மட்டுமே எடுக்க வேண்டும். இந்த புதினாவில் உள்ள பண்புகள் உடலின் இயற்கையான பாதுகாப்பை அதிகரிக்கும். வைரஸ் தொற்றுகள் இருக்கும் போது சிகிச்சையுடன் புதினா தேநீர் குடிக்கலாம்.
புதினா டீ எவ்வாறு தயாரிப்பது?
புதினா டீ தயாரிப்பது சாதாரணமாக நாம் டீ தயாரிப்பது போன்றது தான்.
தேவை
*புதினா இலைகள் – 10-12 இலைகள்
*தண்ணீர் – 1 டம்ளர்
*தேன் – சுவைக்கு (தேவையெனில்)
செய்முறை
*நீரை நன்றாக கொதிக்க வைக்கவும்.
*புதினா இலைகளை சேர்த்து இலேசாக கொதிக்கவிட்டு அடுப்பை அணைக்கவும்.
*சில நிமிடங்கள் அப்படியே வைத்திருந்தால் புதினா இலையின் சாறு இறங்கி இருக்கும்.
*பிறகு வடிகட்டி சுவைக்கு தேன் அல்லடு பனங்கற்கண்டு சேர்க்கலாம்.
*எலுமிச்சை சாறு தேவையென்றாலும் சேர்க்கலாம்.வழக்கமான ப்ளாக் டீ தூள் உடன் புதினா இலை சேர்த்துக் கொள்ளலாம்.
புதினா டீ எப்போது குடிக்கலாம்?
புதினா டீ உணவுடன் குடிப்பது பலரது வழக்கம். ஆனால் இது உணவின் செழுமையை குறைக்கிறது. செரிமானத்துக்கு உதவுகிறது. படுக்கைக்கு முன் குடிப்பதும பாதுகாப்பானது. காஃபின் இல்லாததால் அமைதியான தூக்கத்தை அளிக்கும். நாள் ஒன்றுக்கு இவ்வளவுதான் என்ற வரம்புகள் இல்லை என்றாலும் அதிக அளவு குடிக்க கூடாது. இதுசில பக்க விளைவுகளை உண்டு செய்யலாம்.
அமில ஃரிப்ளக்ஸ் உள்ளவர்கள் புதினா டீ குடிக்கும் போது இது அறிகுறிகளை மோசமாக்கும். அதனால் உடல் நல குறைபாடுள்ளவர்கள், மருந்துகள் எடுப்பவர்கள் தினசரி புதினா டீயை குடிப்பதற்கு முன்பு மருத்துவரிடம் ஆலோசிப்பது நல்லது.
