வடமாகாண ஆளுநர் அவர்களின் எண்ணக்கருவுக்கமைவாக 2025ம் ஆண்டு அபிவிருத்தி திட்டத்தில் கிளிநொச்சி மாவட்டத்தின் நான்கு பிரதேச செயலாளர் பிரிவுகளிலிருந்து அபிவிருத்தி தேவைப்பாடுகளுள்ள ஒரு கிராம சேவகர் பிரிவினை மாதிரிக் கிராமமாக தெரிவு செய்து குறித்த கிராமத்தினை அனைத்து விடயங்களிலும் முன்மாதிரியான ஒரு கிராமமாக முன்னேற்றும் செயற்றிட்டம் ஒன்றினை முன்னெடுக்க தீர்மானிக்கப்பட்டுள்ளது.
அந்தவகையில் கண்டாவளை பிரதேச செயலர் பிரிவில் பிரமந்தனாறு கிராம அலுவலகர் பிரிவினை மாதிரிக் கிராமமாக தெரிவுசெய்துள்ள நிலையில், குறித்த பிரதேசத்தை அபிவிருத்தி செய்தல் தொடர்பான கலந்துரையாடல் இன்று(02.01.2025) நடைபெற்றது.
குறித்த கலந்துரையாடல் கண்டாவளை பிரதேச செயலாளர் ரி.பிருந்தாகரன் தலைமையில், மாவட்ட பதில் அரசாங்க அதிபர் எஸ்.முரளிதரன் அவர்களின் பங்கேற்புடன் காலை 9.00மணிக்கு பிரமந்தனாறு கிராம அலுவலகத்தில் நடைபெற்றது.
இதன்போது குறித்த கிராமத்தின் தேவைப்பாடுகளாக கல்வி, நீர்ப்பாசனம், வீதி அபிவிருத்தி, விவசாயம், கழிவு வாய்க்கால், சுகாதாரம், குடிநீர், மைதான அபிவிருத்தி, உற்பத்திகளை சந்தைப்படுத்தல், சட்டவிரோத செயற்பாடுகள், வாழ்வாதாரம் உள்ளிட்ட பல்வேறு விடயங்கள் தொடர்பில் கலந்துரையாடப்பட்டன.
இவ்வாறான விடயங்களை உள்ளடக்கிய வகையில் பிரமந்தனாறு மாதிரிக் கிராம திட்டம் தயாரிக்கப்படும்.
இங்கு அபிவிருத்தி செயற்பாடுகள் மட்டுமன்றி சகல விடயங்களும் பூர்த்தி செய்து குறித்த திட்டம் 31.06.2025ம் திகதிக்கு முன் முடிவுறுத்தப்படவுள்ளமை குறிப்பிடத்தக்கது.
இக் கலந்துரையாடலில் மாவட்ட சமுர்த்தி பணிப்பாளரும் பதில் திட்டமிடல் பணிப்பாளருமான மோகனபவன், மாவட்ட செயலக மற்றும் பிரதேச செயலக உதவித் திட்டமிடல் பணிப்பாளர்கள், மத்திய மற்றும் மாகாண ஆளுகைக்குட்பட்ட பல்வேறு திணைக்களங்களின் தலைவர்கள், அரச சார்பற்ற நிறுவனங்களின் பிரதிநிதிகள், சமூகமட்ட அமைப்புக்களின் பிரதிநிதிகள் மற்றும் பொதுமக்கள் உள்ளிட்ட பலரும் கலந்து கொண்டிருந்தனர்.
