தமிழ் மக்களுக்கான நிரந்தர அரசியல் தீர்வை எட்டுவதற்காக, தமிழ் அரசியல் கட்சிகள் மற்றும் புலம்பெயர் அமைப்புகளுடன் இணைந்து கூட்டுச் செயற்பாடுகளை முன்னெடுக்கத் தீர்மானித்துள்ளதாக தமிழீழ விடுதலை இயக்கமான ரெலோ தெரிவித்துள்ளது.
வவுனியா வைரவபுளியங்குளத்தில் அமைந்துள்ள ரெலோவின் தலைமை அலுவலகத்தில் இன்று நடைபெற்ற மத்தியகுழுக் கூட்டத்தின் பின்னர், ஊடகங்களிடம் கருத்துத் தெரிவித்த கட்சியின் பேச்சாளர் சுரேன் குருசாமி இதனைத் தெரிவித்துள்ளார்.
ஊழல் மற்றும் இலஞ்சக் குற்றச்சாட்டுகளுடன் தொடர்புடையவர்களைக் கைது செய்வதற்கு அரசாங்கம் நடவடிக்கை எடுப்பது வரவேற்கத்தக்கது எனக் குறிப்பிட்ட அவர், தேர்தல் காலத்தில் வடக்கு, கிழக்கு தமிழ் மக்களுக்கு ஜனாதிபதியும் அவரது கட்சியும் வழங்கிய வாக்குறுதிகள் இதுவரை நிறைவேற்றப்படவில்லை எனக் குற்றஞ்சாட்டினார்.
புதிய அரசியலமைப்பின் ஊடாக தமிழ் மக்களுக்கான நிரந்தர அரசியல் தீர்வு வழங்கப்படும் என உறுதியளிக்கப்பட்ட போதிலும், அது தொடர்பில் இதுவரை குறிப்பிடத்தக்க முன்னேற்றம் ஏற்படவில்லை என்றும் அவர் தெரிவித்தார்.
இதற்கமைய, உள்ளூரில் இயங்கும் ஆறு தமிழ் பேசும் கட்சிகள், ஜனநாயகத் தமிழ்த் தேசியக் கூட்டணியில் அங்கம் வகிக்கும் ஐந்து கட்சிகள் மற்றும் தமிழ் தேசிய அரசியல் பரப்பில் உள்ள ஏனைய சக்திகளை ஒன்றிணைத்து, அரசாங்கத்திற்கு அழுத்தம் கொடுக்கத் தீர்மானிக்கப்பட்டுள்ளதாகக் கூறினார்.
மேலும், பிரித்தானியா உள்ளிட்ட வெளிநாடுகளில் இயங்கும் புலம்பெயர் அமைப்புகளுடன் இணைந்து, சர்வதேச நாடுகளின் ஆதரவையும் அழுத்தத்தையும் பெற்று அரசியல் தீர்வை நோக்கிச் செயற்படவும் முடிவு செய்யப்பட்டுள்ளதாகத் தெரிவித்தார்.
நீண்டகாலமாகப் பிற்போடப்பட்டு வரும் மாகாண சபைத் தேர்தலை விரைவாக நடத்துவதற்கு அரசாங்கத்திற்கு அழுத்தம் கொடுப்பதுடன், பயங்கரவாதத் தடைச் சட்டத்திற்குப் பதிலாக முன்மொழியப்படும் புதிய பயங்கரவாத எதிர்ப்புச் சட்டத்திற்கும் எதிர்ப்புத் தெரிவித்து, அனைத்துத் தரப்பினரையும் ஒன்றிணைத்துப் போராடத் தீர்மானிக்கப்பட்டுள்ளதாக அவர் குறிப்பிட்டார்.
நாட்டின் பொருளாதார நெருக்கடி காரணமாக தமிழ் மக்கள் வாழ்வாதாரப் பிரச்சினைகளை எதிர்கொள்வதாகவும், அத்தியாவசியப் பொருட்களின் விலையேற்றம் மற்றும் அதிகரித்த வரிச்சுமை காரணமாக அன்றாட வாழ்க்கையை முன்னெடுப்பதில் மக்கள் சிரமங்களை எதிர்கொள்வதாகவும் அவர் தெரிவித்தார்.
இந்தப் பொருளாதார நெருக்கடிகளுக்குத் தீர்வு காணுமாறு அரசாங்கத்திற்கு அழுத்தம் கொடுக்கும் வகையில், வெகுஜனப் போராட்டங்களை முன்னெடுக்கவும் தீர்மானிக்கப்பட்டுள்ளதாகக் கூறினார்.
தேர்தல் அரசியலுக்கு அப்பால், தமிழ் மக்களின் பொதுவான பிரச்சினைகள், உரிமைகள் மற்றும் வாழ்வாதாரப் போராட்டங்களில் அனைத்துத் தமிழ் தேசியக் கட்சிகளும் இணைந்து செயற்பட வேண்டும் என்றும் ரெலோ வலியுறுத்தியுள்ளது.
அண்மையில் யாழ்ப்பாணத்தில் நடைபெற்ற உண்ணாவிரதப் போராட்டத்தில் இலங்கைத் தமிழரசுக் கட்சியுடன் இணைந்து செயற்பட்டதைப் போன்று, எதிர்காலத்திலும் தமிழ் மக்களின் உரிமைகள் மற்றும் வாழ்வாதாரப் பிரச்சினைகளுக்காக அனைத்துத் தமிழ் அரசியல் சக்திகளும் ஒன்றிணைந்து செயற்படவுள்ளதாக ரெலோவின் பேச்சாளர் சுரேன் குருசாமி மேலும் தெரிவித்துள்ளார்.
