வெலிசர சிறப்புத் தடுப்பு மையத்தில் தடுத்து வைக்கப்பட்டுள்ள சிந்தகா விக்ரமரத்ன எனப்படும் ‘ஹரக் கட்டா’வின் உயிருக்கு அச்சுறுத்தல் இருப்பதாகக் கூறி, அவரது தந்தை நெல்சன் மெர்வின் விக்ரமரத்ன இலங்கை மனித உரிமைகள் ஆணைக்குழுவில் முறைப்பாடு செய்துள்ளார்.
தனது மகன் தங்காலை பழைய சிறைச்சாலையிலிருந்து வெலிசர சிறப்புத் தடுப்பு மையத்திற்கு மாற்றப்பட்டதைத் தொடர்ந்து, அவரது பாதுகாப்பு குறித்து கவலை ஏற்பட்டுள்ளதாக தந்தை தெரிவித்துள்ளார்.
குறிப்பாக, ‘ஹரக் கட்டா’வின் எதிரிகளாகக் குறிப்பிடப்படும் சிலரும் அதே தடுப்பு மையத்தில் தடுத்து வைக்கப்பட்டுள்ளதாகவும், இதனால் அவரது உயிருக்கு அச்சுறுத்தல் ஏற்படக்கூடும் எனவும் முறைப்பாட்டில் தெரிவிக்கப்பட்டுள்ளது.
இதேவேளை, கடந்த 22ஆம் திகதி ‘ஹரக் கட்டா’வுக்கும் கெஹெல்பத்தர பத்மேவுக்கும் இடையில் இடம்பெற்றதாகக் கூறப்படும் மோதலில் பத்மே காயமடைந்ததாகவும் அவரது தந்தை தெரிவித்துள்ளார்.
இந்தச் சம்பவத்தைத் தொடர்ந்து, தனது மகனைச் சந்திப்பதற்கு குடும்பத்தினருக்கோ அல்லது அவரது சட்டத்தரணிகளுக்கோ அனுமதி வழங்கப்படவில்லை எனவும் அவர் குற்றம் சாட்டியுள்ளார்.
இதனையடுத்து, வெலிசர சிறப்புத் தடுப்பு மையத்தில் தனது மகனின் பாதுகாப்பை உறுதி செய்வதுடன், அவரைச் சந்திப்பதற்கான உரிமையும் வழங்கப்பட வேண்டும் எனக் கோரி இலங்கை மனித உரிமைகள் ஆணைக்குழுவில் முறைப்பாடு செய்யப்பட்டுள்ளதாக தெரிவிக்கப்படுகிறது.
