சுமார் 46 கோடி ரூபாய் பணத்தைக் காசோலை மூலமாக மோசடி செய்ததாக நடிகை அம்பிகா மற்றும் அவரது சகோதரர் மீது, அம்பிகாவின் தங்கையான நடிகை ராதா சென்னை பொலிஸ் ஆணையர் அலுவலகத்தில் புகார் அளித்துள்ளார்.
அவர் அளித்துள்ள புகாரின் விபரங்களின்படி, ராதா ‘ஏஆர்எஸ் கார்டன்ஸ்’ (ARS Gardens) எனும் பெயரில் தொழில் செய்து வந்ததாகவும், அதற்காக போரூரில் உள்ள தனியார் வங்கியொன்றில் நடப்புக் கணக்கு வைத்திருந்ததாகவும் குறிப்பிட்டுள்ளார்.
தான் அடிக்கடி பயணங்களில் இருப்பதால், பராமரிப்புச் செலவுகளுக்காகத் தொகை நிரப்பப்படாத, கையெழுத்திடப்பட்ட 5 அல்லது 6 காசோலைகளைச் சென்னையில் தான் தங்கும் வீட்டில் வைத்துவிட்டுச் செல்வது வழக்கம் எனத் தெரிவித்துள்ளார்.
கடந்த 2025 ஆம் ஆண்டு தனது நிறுவனத்தின் பெயரை ‘ஆர்ஆர் கார்டன்ஸ்’ (RR Gardens) என மாற்றி, புதிய பெயரில் வங்கிக் கணக்கு தொடங்கியுள்ளார்.
இதனால் பழைய காசோலைகளைப் பயன்படுத்துவதை நிறுத்திய அவர், கையெழுத்திடப்பட்ட பழைய காசோலைகள் குறித்து மறந்துவிட்டுள்ளார்.
இந்நிலையில், செப்டம்பர் 17 ஆம் திகதி பழைய வங்கிக் கணக்குக் காசோலைகள் மூலமாக அம்பிகா என்ற பெயரில் பணப்பரிமாற்றக் கோரிக்கை விடுக்கப்பட்டுள்ளதாக வங்கியிலிருந்து தகவலளிக்கப்பட்டுள்ளது.
அந்தக் காசோலைகளைத் தனது சகோதரியிடம் ஒருபோதும் வழங்கவில்லை என்றும், அத்தகைய பணப்பரிமாற்ற நடவடிக்கைகளில் ஈடுபடவில்லை என்றும் ராதா சுட்டிக்காட்டியுள்ளார்.
அந்தக் காசோலைகளைத் தனது சகோதரர் மல்லிகார்ஜுனா நிரப்பியுள்ளதாகவும், அவரும் சகோதரி அம்பிகாவும் இணைந்து இந்த மோசடியில் ஈடுபட்டுள்ளதாகவும் அவர் தனது புகாரில் குற்றம்சாட்டியுள்ளார்.
மேலும், சொத்தில் தனது பங்கைப் பெறுவதைத் தனது சகோதரியும் சகோதரரும் தடுத்ததாகவும் ராதா தனது புகாரில் குறிப்பிட்டுள்ளார்.
