‘கோட்-டெஸ்-நெய்ஜஸ்’ (Côte-des-Neiges) குடியிருப்புப் பகுதியில் நிகழ்த்தப்பட்ட தாக்குதல் தொடர்பான விரிவான விசாரணைகள் முடக்கி விடப்பட்டுள்ளன.
இந்தத் தாக்குதலில் முகமது லமீன் பென்ரெடோவன் (Mohamed Lamine Benredouane) என்ற பெயருடைய காவல்துறை அதிகாரி உயிரிழந்தார்.
இவர் 2021-ஆம் ஆண்டு முதல் மொன்றியல் பொலிஸ் படையில் (SPVM) பணியாற்றி வந்தவர் எனத் தெரிவிக்கப்பட்டுள்ளது.
கட்டிடத்தின் ஜன்னல் வழியாகத் துப்பாக்கி ஒன்று வெளியே நீட்டிக்கொண்டிருப்பதாகக் கிடைத்த தகவலைத் தொடர்ந்து, சம்பவ இடத்திற்கு விரைந்த காவல்துறையினர் மீது, ஆயுதம் தாங்கிய நபர் பதுங்கியிருந்து தாக்குதல் நடத்தியுள்ளார்.
சமூக வலைத்தளங்களில் வெளியான காணொளிகளின்படி, முழு இராணுவ உடையில் வந்த துப்பாக்கிதாரி, நீண்ட ரகத் துப்பாக்கியால் காவல்துறையினர் மீது சரமாரியாகச் சுட்டுள்ளார்.
மொன்றியல் பொலிஸ் வரலாற்றில் கடந்த 24 ஆண்டுகளில் கடமையின் போது ஒரு காவல்துறை அதிகாரி சுட்டுக்கொல்லப்படுவது இதுவே முதல்முறையாகும்.
அவருடன் யூத கனேடியச் சமூகத்தைச் சேர்ந்த மைக்கேல் மிஸ்ராகி (Michael Mizrahi) என்ற பொதுமகன் ஒருவரும் இத்தாக்குதலில் உயிரிழந்துள்ளார்.
இதனையடுத்து முன்னெடுக்கப்பட்ட பதில் தாக்குதலில் அந்த துப்பாக்கிதாரி சுட்டுக் கொல்லப்பட்டார்.
சம்பவ இடத்திற்கு முதலில் சென்ற மற்றொரு பெண் காவல்துறை அதிகாரி படுகாயமடைந்த நிலையில் தீவிர சிகிச்சைப் பிரிவில் அனுமதிக்கப்பட்டார்.
தற்போது அந்த பெண் காவல்துறை அதிகாரியின் நிலைமை சீராக உள்ளதென மருத்துவமனை வட்டாரங்கள் தெரிவிக்கின்றன.
இதேவேளை, தாக்குதல் நடத்திய நபர் தங்கியிருந்த விடுதி அறையிலிருந்து 100 பக்கங்களுக்கும் அதிகமான வன்முறைக் கொள்கை அறிக்கை (Manifesto) கைப்பற்றப்பட்டுள்ளது.
கொலையாளி பெண்களுக்கு எதிரான வன்முறையைத் தூண்டும் தீவிரவாத கொள்கை கொண்டவர் என்பதும், ஆபாசத் திரைப்படத் துறையை ஒழிப்பதற்காகவே இத்தாக்குதலை திட்டமிட்டதும் விசாரணையில் தெரியவந்துள்ளது.
துப்பாக்கிச் சூடு நடந்த கட்டிடம், ‘போர்ன்ஹப்’ (Pornhub) ஆபாசக் காணொளி இணையதளத்தின் தாய் நிறுவனமான ‘அய்லோ‘ (Aylo) நிறுவனத்தின் தலைமையகம் ஆகும் என்பது குறிப்பிடத்தக்கது.
